ސޮނީ ޗެނަލްގެ "ކުސުމް" އާއި "ބާރަތު ކާ ވީރް ޕުތުރާ: މަހާރާނާ ޕްރަތާބް" ފަދަ ސިލްސިލާތައް ކުޅެފައިވާ ބަތަލާ އާޝްކާ ގޮރާޑިއާ ރޭ ކައިވެނިކޮށްފި އެވެ.
އޭނާ ކައިވެނި ކުރީ މިދިޔަ އަހަރުން ފެށިގެން ލޯބީގެ ގޮތުން ގުޅިގެން އުޅޭ އެމެރިކާ މީހެއް ކަމަށްވާ ބްރެންޓް ގޮބްލްއާ އެވެ. އެ ދެ މީހުން ވަނީ ދާދި ފަހުން ސްޓާ ޕްލަސް އުން ދެއްކި ޑާންސް ޝޯ "ނަޗްބަލިޔޭ 8" ގައި ވެސް ވާދަކޮށްފަ އެވެ.
އާޝްކާ އާއި ބްރެންޓްގެ ކައިވެނީގެ ހަފުލާގައި، އާޝްކާގެ ބައެއް ޓީވީ ރައްޓެހިން ބައިވެރިވި އެވެ. އޭގެ ތެރޭގައި މޯނީ ރޯއި، ސަނާ ހާން، އަދާ ހާން އަދި ކަރަން ވީރް ބޯރާ އާއި އޭނާގެ އަންހެނުން ހިމެނެ އެވެ.
ކައިވެންޏާ ބެހޭ ގޮތުން އާޝްކާ ބުނީ އޭނާގެ ލޯބީގެ ވާހަކައަކީ ހިޔާލީ ވާހަކައެއް ކަހަލަ އެއްޗެއް ކަމަށާއި ކައިވެނީގެ ހަފުލާ ވެސް ބާއްވާން ބޭނުންވީ އެކަހަލަ ގޮތަކަށެވެ. އިންޑިއަން ތީމަކަށް ހަފުލާ ބޭއްވި ނަމަވެސް، ކައިވެނީގެ ހެދުމުގެ ގޮތުގައި ބޭނުން ކުރީ ވެސްޓަން ހެދުމެވެ.
"އިންޑިއަން ތީމަކަށް ކައިވެނީގެ ހަފުލާ ބާއްވަން ބްރެންޓްގެ އާއިލާ މީހުން ވެސް ބޭނުންވީ،" 32 އަހަރުގެ ބަތަލާ ބުންޏެވެ.
ހަނީމޫނާ ބެހޭ ގޮތުން ސުވާލު ކުރުމުން އާޝްކާ ބުނީ ބްރެންޓްގެ އާއިލާ އިންޑިއާ ދެކިލަން ބޭނުންވާތީ، އެ މީހުންގެ މައިގަނޑު މަންޒިލަކަށް ވާނީ ރާޖަސްތާން ކަމަށެވެ.