ރައީސް އަބްދުﷲ ޔާމީނާއި އަނބިކަނބަލުން ފާޠިމަތު އިބްރާހީމް، އަންނަ ބުދަ ދުވަހު ޗައިނާ އަށް ވަޑައިގަންނަވާ ގޮތަށް ހަމަޖައްސަވައިފި އެވެ.
އަންނަ ހޮނިހިރު ދުވަހާ ހަމައަށް ޗައިނާ އަށް ކުރައްވާ މި ފުރަމާނަ ދަތުރުފުޅަކީ އެ ޤައުމުގެ ރައީސް ޝީ ޖިންޕިންގެ ދަޢުވަތަކަށް ކުރައްވާ ފުރަމާނަ ދަތުރުފުޅެކެވެ.
ރައީސްގެ ދެކަނބަލުންގެ މި ދަތުރުފުޅުގައި، ރާއްޖެ އާއި ޗައިނާގެ އިސްވެރިންގެ މެދުގައި މަޝްވަރާތައް ބޭއްވުމަށާއި ދެ ޤައުމުގެ ދެމެދުގައި ގުޅުން ބަދަހިކުރުމާ ބެހޭ އެއްބަސްވުންތަކެއްގައި ސޮއި ކުރެއްވުމަށް ވަނީ ހަމަޖެހިފަ އެވެ.
މި އަހަރަކީ ދިވެހިރާއްޖެ އާއި ޗައިނާ އާއި ދެމެދު ސިޔާސީ ގުޅުން ޤާއިމުކުރިތާ 45 އަހަރު ފުރޭ އަހަރެވެ. ރައީސްގެ މި ދަތުރުފުޅުގެ ސަބަބުން ދެ ޤައުމުގެ ދެމެދުގައިވާ ޒަމާންވީ އެކުވެރި ގުޅުން ދެ ޤައުމަށާއި، ދެ ޤައުމުގެ ރައްޔިތުންނަށް ފައިދާ ހުރި ގޮތެއްގައި އިތުރަށް ބަދަހިވެގެންދާނެ ކަމަށް އުންމީދު ކުރާ ކަމަށް ރައީސް އޮފީހުން ބުންޏެވެ.
ރައީސް ޔާމީންގެ މިދަތުރުފުޅަކީ އެ މަނިކުފާނު މަޤާމާ ހަވާލުވެވަޑައިގަތުމަށް ފަހު ޗައިނާއަށް ކުރައްވާ ފުރަތަމަ ފުރަމާނަ ދަތުރުފުޅެވެ.
ރައީސް ވަނީ 2014 ވަނަ އަހަރާއި 2015 ވަނަ އަހަރު ޗައިނާ އަށް ރަސްމީ ދަތުރުފުޅުތަކެއް ކުރައްވައިފަ އެވެ.