ހިންދީ ސިނަމާގައި 1960 އާއި 1970 ގެ އަހަރުތަކުގައި ރަސްކަން ކުރި ކުރީގެ މަޝްހޫރު އެކްޓަރު ޝަޝީ ކަޕޫރް މިއަދު މަރުވެއްޖެ އެވެ.
މިއަދު ހަވީރުގެ ވަގުތެއްގައި އުމުރުން 79 އަހަރުގެ އެކްޓަރު މަރުވީ ސިއްހީ ގިނަ މައްސަލަތަކެއް ވެސް ދިމާވެފައި ވަނިކޮށެވެ. ދެހާސް ސާދަ ވަނަ އަހަރު ކުރިމަތިވި މޭމަތީގެ އިންފެކްޝަނާ ގުޅިގެން އޭނާ ވަނީ ބައިޕާސް ސާޖަރީއެއް ވެސް ހަދައިފަ އެވެ.
ޝަޝީގެ ފިލްމީ ކެރިއަރުގައި 160 އަށް ވުރެ ގިނަ ފިލްމް ކުޅެފައިވާ އިރު، އޭގެ ތެރޭގައި ވަރަށް ފާހަގަކޮށްލެވޭ މަޝްހޫރު ގިނަ ފިލްމްތަކެއް ހިމެނެ އެވެ. އޭގެ ތެރޭގައި ދީވާރް (1975)، ޖަބް ޖަބް ޕޫކް ކިލޭ (1965)، ކަބީ ކަބީ (1976) އަދި ސަތިއަން ޝިވަމް ސުންދަރަމް (1978) ފަދަ ފިލްމްތައް ހިމެނެ އެވެ.
އިންޑިއާގެ ކަޕޫރް އާއިލާ އަށް ނިސްބަތްވާ އަދި ބޮލީވުޑްގެ އެންމެ ރީތި އެކްޓަރުންގެ ތެރޭގައި ހިމެނޭ ޝަޝީއަކީ ތިން ފަހަރެއްގެ މަތިން ނެޝަނަލް އެވޯޑް ވެސް ލިބިފައިވާ އެކްޓަރެކެވެ.
އޭނާ އަށް 2010 ގައި ވަނީ ފިލްމްފެއާ ލައިފްޓައިމް އެޗީވްމަންޓް އެވޯޑް ވެސް ދީފަ އެވެ. ޝަޝީ އެކްޓް ކުރުމުން ރިޓަޔާ ކުރީ 1999 ގަ އެވެ.
އިންޑިއާގެ ސިނަމާ އަށް ކޮށް ދިން ހިދުމަތްތަކުގެ އަގު ވަޒަންކޮށް އިންޑިއާ ސަރުކާރުން 2011 ގައި ޕަދްމަން ބުޝަން އެވޯޑް އަރުވާފައިވާ އިރު، 2015 ގައި ދާދާ ސާހެބް ޕާލްކޭ އެވޯޑް ވެސް ޝަޝީ އަށް ލިބިފައިވެ އެވެ.
ޝަޝީގެ އަންހަނުން ޖެނިފާ ކެންޑަލް 1984 މަރުވެފައިވާ އިރު، ކައިވެންޏަށް ތިން ދަރިން ވެސް ލިބިފައިވެ އެވެ.
ފިލްމްތަކުގައި އެކްޓް ކުރުމުގެ އިތުރުން ޝަޝީއަކީ ޑައިރެކްޓަރެއްގެ އިތުރުން ފިލްމް ޕްރޮޑިއުސް ވެސް ކޮށްފައިވާ މީހެކެވެ.
ޝަޝީއާ އެކު ގިނަ ފިލްމްތަކެއް ކުޅެފައިވާ އަމީތާބް ބައްޗަން 1991 ގައި ކުޅުނު ފިލްމް "އަޖޫބާ" އަކީ ޝަޝީ ޑައިރެކްޓް ކުރި ފިލްމެކެވެ.