ޗައިނާ-މޯލްޑިވްސް ފްރީ ޓްރޭޑް އެގްރީމެންޓް (އެފްއާރްޓީ) އަކީ ކުރިއަށް އޮތް ތަނުގައި ދިވެހިންނަށް އިގްތިސާދީ ބޮޑު ދަންތުރައެއް ކަމަށް އަދާލަތު ޕާޓީގެ މީޑިއާ ކޮމެޓީގެ ޗެއާ އަލީ ނަޒީރު ވިދާޅުވެއްޖެ އެވެ.
"ހަމައެއް ލަމައެއް ނެތް ވިޔަފާރީގެ އެއްބަސްވުން"ގެ ނަމުގައި އިދިކޮޅު ފަރާތްތަކުން ރޭ މ. ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ނަޒީރު ވިދާޅުވީ، ޗައިނާ ސަރުކާރާއެކު ސޮއިކުރުމަށް ތައްޔާރުވަމުންދާ އެއްބަސްވުމުގައި މިނިވަން ވިޔަފާރީގެ އެއްވެސް އަސާސީ ސިފައެއް ހިމެނިފައި ނެތް ކަމަށެވެ.
"މިނިވަން ވިޔާފާރީގެ އެއްބަސްވުމެއް ގާއިމު ކުރެވޭއިރުގަ އެވާންޖެހޭ ދެފަރާތުން ހަމަހަމަ ފުރުސަތުތަކެއް އޮންނަ އެއްބަސްވުމަކަށް. އެނޫން ގޮތަކަށް ހެދޭ އެއްބަސްވުމެއް ދެމެހެއްޓުމަކީ ވެސް ކުރެވޭނެ ކަމެއް ނޫން." ނަޒީރު ވިދާޅުވިއެވެ.
ނަޒީރު ވިދާޅުވީ ގާނޫނުތަކާއި ގަވާއިދުތަކާ ހިލާފަށް ސަރުކާރުން ޗައިނާ އާއި އެކު ސޮއިކުރުމަށް ތައްޔާރުވަމުން މިދާ އެއްބަސްވުމުގެ ސަބަބުން ދިވެހި އުފެއްދުންތަކަށް ދުނިޔޭގެ ބާޒާރުގައި މާކެޓް ގެއްލިގެން ދާނެ ކަމަށެވެ.
" ދިވެހިރާއްޖޭގެ ބާޒާރުގައި ޗައިނާގެ މުދާ އެއްވެސް ހިފެހެއްޓުމެއްނެތި، ދިވެހި އުފެއްދުންތަކާ ވާދަކުރަން އަޅުގަނޑުމެން ހުޅުވާލާ ކަމަށްވާނަމަ، ދިވެހި އުފެއްދުއްތަކަށް ދުނިޔޭގެ ބާޒާރުގައި އަދި ރާއްޖޭގެ ބާޒާރުގައިވެސް މާކެޓް ގެއްލިގެންދާނެ،"
ޗައިނާ-މޯލްޑިވްސް ފްރީ ޓްރޭޑް އެގްރީމެންޓާ ގުޅިގެން ދިވެހި ވިޔަފާރިވެރިންނަށް ވެސް ޗައިނާގެ ބާޒާރަށް ދިވެހި އުފެއްދުން ވިއްކުމުގެ ފުރުސަތު ހުޅުވިގެންދާނެ ކަމަށް ބުނަމުން ގެންދާތީ ނަޒީރު ވަނީ އެކަމަށް ފާޑުވިދާޅުވެފައެވެ.
ނަޒީރު ވިދާޅުވީ، އިގްތިސާދީ ގޮތުން އެކަން އެގޮތަށް ހިނގަންޖެހޭ ސަބަބެއް ނެތް ކަމަށާއި އެއީ ކަރުދާހުގައި ލިޔެގެން ހިނގާ ކަމެއް ނޫން ކަމަށެވެ.
އަދި ގަދަ ބާރުން ޗައިނާގެ އުފެއްދުންތަކުގެ އަގު ދިވެހި އުފެއްދުންތަކާއި އެއް ހަމައަކަް ނުގެންދެވޭނެކަމަށް ނަޒީރު ވިދާޅުވިއެވެ.
"އަޅުގަނޑުމެންނަށް ގަދަބާރުން ޗައިނާގެ އުފެއްދުންތަކުގެ އަގު، ދިވެހި އުފެއްދުންތަކުގެ އަގާ އެއް ހަމައަކަށް ނުގެންދެވޭނެ. އެކަންވާނީ އެކަން އެގޮތައްވުމަށް އިގްތިސާދީ ސަބަބުތަކެއް އެކުލެވުނީމަ،" ނަޒީރު ވިދާޅުވި އެވެ.