މޯލްޑިވިއަންގެ ޕައިލެޓުންތަކެއް އެ އެއާލައިންގެ ސަލާމަތީ ކަންކަމާ ގުޅޭ ގޮތުން ކަންބޮޑުވުން ފާޅުކޮށްފައި ވަނިކޮށް، އެ އެއާލައިން އޮޕަރޭޓް ކުރަނީ ސަލާމަތީ މިންގަނޑުތަކާ އެއްގޮތަށް ކަމަށާއި އަގު ވެއްޓޭ ފަދަ ވާހަކަތައް ނުފެތުރުމަށް އައިލެންޑް އޭވިއޭޝަން ސާވިސަސް (އައިއޭއެސް) އިން އިލްތިމާސްކޮށްފި އެވެ.
އެ ކުންފުނިން މިއަދު ނެރުނު ބަޔާނެއްގައި ބުނީ އެއެންމެ ބޮޑަށް އިސްކަން ދެނީ ފަސިންޖަރުންނާއި ފަޅުވެރިންގެ ސަލާމަތަށް ކަމަށާއި ހަގީގަތާ ހިލާފު ވާހަކަތައް ފަތުރާ ފަރާތްތަކަށް ގާނޫނީ ފިޔަވަޅު ވެސް އަޅާނެ ކަމަށެވެ.
"މި އެއާލައިންއަކީ މޯލްޑިވްސް ސިވިލް އޭވިއޭޝަނުން ކަނޑައަޅާފައިވާ ސަލާމަތީ މިންގަނޑުތަކާއި އަދި ކަނޑައެޅިފައިވާ ގަވާއިދުތަކުގެ އިމުގެ ތެރެއިން މަސައްކަތް ކުރަމުން އަންނަ ގަވައިދުން އޮޑިޓް ކުރެވޭ އެއާލައިނެއް ކަމަށް ދަންނަވަމެވެ،" ބަޔާނުގައިވެ އެވެ. "ކަން މިހެން އޮތް އިރު، ވަކި ބައެއްގެ މަސްލަހަތު ކުރިއަށް ނެރެ، ވަކި ބައެއްގެ ލާބައާއި މަންފާއަށްޓަކައި ސައް ހަނޫން މައުލޫމާތު ބައެއް ފަރާތްތަކުން ފަތުރަމުންދާތީ، ނުހަނު ކަންބޮޑުވާ ކަމެކެވެ."
ގައުމީ އެއާލައިން އޮޕަރޭޓް ކުރާ ކުންފުނިން ބުނީ މިފަދަ ކަންކަމަކީ ދިވެހިންގެ 100 ޕަސެންޓް ހިއްސާވާ އެ ކުންފުންޏަށް ބޮޑު ގެއްލުމެއް ލިބިދާނެ ކަމެއް ކަމަށެވެ.