ވައިގެ މަގުން ދަތުރު ކުރާ ފަސިންޖަރުންގެ ހައްގުތައް ރައްކާތެރި ކުރުމުގެ ބިލެއް އަންނަ އަހަރު ސަރުކާރުން ރައްޔިތުންގެ މަޖިލީހަށް ހުށަހަޅާނެ ކަަމަށް ޓޫރިޒަމް މިނިސްޓަރު މޫސާ ޒަމީރު ވިދާޅުވެއްޖެ އެވެ.
އިއްޔެ ފާހަގަ ކުރި ބައިނަލްއަގުވާމީ މަދަނީ ވައިގެ ދަތުރު ފަތުރުގެ ދުވަހާ ގުޅިގެން މިނިސްޓަރު ދެއްވި ޚިތޯބެއްގައި ވިދާޅުވީ ފަސިންޖަރުންގެ ހައްގުތައް ހޯދައިދީ އެ މީހުންގެ އިތުބާރު ހޯދުމަށް ސަރުކާރުން އަބަދުވެސް އިސްކަންދޭ ކަމަށެެވެ.
ޒަމީރް ވިދާޅުވީ ފަސިންޖަރުންގެ ހައްގުތައް ރައްކާތެރިކުރުމުގެ ބިލް ގާނޫނަކަށްވުމުން ސިވިލް އޭވިއޭޝަންގެ ގާނޫނީ އޮނިގަނޑު ހަރުދަނާކުރެވި އިތުރަށް ފުރިހަމަވެގެން ދާނެ ކަމަށެވެ.
އޭނާ ވިދާޅުވީ ތަފާތު ވައްތަރުގެ އުދުހުންތައް ރާއްޖެ އަށް ތައާރަފު ކުރުމުގެ ފުރުސަތު ވެސް ސަރުކާރުން ހުޅުވާލާފައިވާ ކަމަށެވެ.
އެގޮތުން އުދުހުން ކުޅިވަރެއްގެ ގޮތުގައި ތައާރަފްކުރުމަށް "އޭވިއޭޝަން ރެކްރިއޭޝަނަލް އޯގަނައިޒޭޝަން" އިން ހުއްދަ ދީފައިވާ ކަމަށާއި އެ ހުއްދައިގެ ދަށުން ހެލިކޮޕްޓަރު އޮޕަރޭޝަނާ ބެހޭ ގޮތުން އިނގިރޭސިވިލާތުގެ ސިވިލް އޭވިއޭޝަން އޮތޯރިޓީއާ އެކު އެއްބަސްވުމެއްވެފައިވާ ކަމަށް ވިދާޅުވިއެވެ.
އަދި "ފްރޭމްވޯކް އެގްރީމެންޓު" ގެ ދަށުން ކަމާގުޅޭ ރިސްކް އެސެސްމަންޓެއް މިހާރުވަނީ ހަދައި ނިމިފައި ކަމަށާއި އެ އެސެސްމެންޓަށް ބިނާކޮށް ހެދި ޑްރާފްޓް ރިޕޯޓަށް ސަރުކާރުން މައުލޫމާތު ހިއްސާކޮށްފައި ވާނެ ކަމަށް މިނިސްޓަރު ވިދާޅުވި އެވެ.
ޒަމީރު ވިދާޅުވީ ރާއްޖެގެ ވައިގެ ދަތުރުފަތުރުގެ ނިޒާމަށް ދިމާވެފައިވާ އެންމެ ބޮޑު މައްސަލައަކީ އިންސާނީ ވަސީލަތް ހޯދުން ކަމަށެވެ.
އަދި މަތިންދާ ބޯޓުތަކުގެ ފަޅުވެރިންގެ ފެންވަރުމަތިކޮށް ދުނިޔޭގެ ކުރިއަރައިފައިވާ ގައުމުތަކުގައި ގެންގުޅޭ "ފެޓީގް ރިސްކް މެނޭޖުމަންޓް ސިސްޓަމް" ރާއްޖޭގައި ވެސް ގާއިމްކުރާނެ ކަމަށް ވިދާޅުވި އެވެ.