އައްޑޫ ސިޓީ ކައުންސިލުން ފޭދޫ ފުޓްބޯޅަ ދަނޑު މަރާމާތުކޮށްދިނުމަށް ނިންމައިފި އެވެ.
ކައުންސިލުން މިގޮތަށް ނިންމާފައި ވަނީ މިދިޔަ މަހުގެ ތެރޭގައި ބޭއްވި ކައުންސިލްގެ 2017 ވަނަ އަހަރުގެ 46 ވަނަ ޖަލްސާގަ އެވެ.
"އައްޑޫލައިވްޢ އަށް ކައުންސިލްގެ އޮފިޝަލަކު ވިދާޅުވީ، ފޭދޫ ދަނޑު މަރާމާތު ކޮށްދިނުމަށް ނިންމާފައި ވަނީ، 2018 ވަނަ އަހަރުގެ ޖެނުއަރީ މަހު ބޭއްވުމަށް ހަމަޖެހިފައިވާ "ފޭދޫ ސޮކަރ ކަޕް 2018" ބޭއްވުމަށް ހަމަޖެހިފައިވާތީ ކަމަށެވެ.
އޮފިޝަލް ވިދާޅުވި ގޮތުގައި ކައުންސިލުން ފޭދޫ ދަނޑުގެ ރޮސްޓަމްގައި ކުލަ ލުމާއި ދަނޑުގެ ޗޭޖިން ރޫމަށާއި ރޮސްޓަމަށް ބޭނުންވާ ގޮނޑިތައް ހޯދައި ދޭނެ އެވެ. އަދި ފަންކާ އާއި ބޮކިތައް ވެސް ހަރުކޮށް ދިނުމަށް މިހާރު ނިންމާފައިވާ ކަމަށެވެ.
ފޭދޫ ފުޓްބޯޅަ ދަނޑުގައި ޖަހާފައިވާ ލައިޓް ޕޯސްޓްތަކަކީ ވެސް އައްޑޫ ސިޓީ ކައުންސިލްގެ ޚަރަދުގައި ޖަހާފައިވާކަން ލައިޓްތަކެއްކަން ފާހަގަކޮށްލެވެ އެވެ.
ކައުންސިލުން ފޭދޫ ދަނޑު މަރާމާތުކޮށް ދޭން ނިންމާފައިވާ އިރު، އަންނަ މަހު ފޭދޫ ސޮކާ ކަޕްގެ ނަމުގައި މުބާރާތެއް ވެސް ބާއްވަން ފޭދޫގެ ޖަމިއްޔާއަކުން މިހާރު އަންނަނީ ތައްޔާރުވަމުންނެވެ.