ބޮލީވުޑްގެ ޒުވާން ބަތަލާ އާލިއާ ބަޓް ބުނި ގޮތުގައި ވަރުން ދަވަންގެ "ޖުޅްވާ 2" އަށް ލިބުނު ބޮޑު ކާމިޔާބީ އަށް ފަހު، އެ ފިލްމްގެ ތިން ވަނަ ބައިން ފުރުސަތެއް ދޭން ވަރުންގެ ބައްޕަ އަދި ޑައިރެކްޓަރު ޑޭވިޑް ދަވަންގެ ކިބައިން އޭނާ އެދުނެވެ.
"އެކަމަކު ޑޭވިޑް ސާ ބުނީ ޖުޅްވާ ތިނެއްގެ ރޯލަކަށް ވުރެ މާ ބޮޑު އަދި މާ މުހިއްމު ރޯލެއް އަހަންނަށް އެބަ އޮތް ކަމަށް،" ހުނަރުވެރި ބަތަލާ ބުންޏެވެ.
ނަމަވެސް އެ ވާހަކަ ދެކެވުނުތާ ދުވަސްތަކެއް ފަހުން އަނެއްކާ ވެސް ހަމަ ކުރީގެ ވާހަކަ ތަކުރާރު ކުރި ކަމަށް އާލިއާ ބުންޏެވެ.
"މި ފަހަރު ޑޭވިޑް ސާ ބުނީ އަހަރެން ލައްވައި ކުޅުވަން ބޭނުން ވަނީ ޗާލްބާޒްގެ ރިމެކިން ކަމަށް. އެހެންވެ ވަރަށް އުފަލުން މި ހުރީ،" ސްރީދޭވީ ޑަބަލް ރޯލް ކުޅުނު ފިލްމާ ބެހޭ ގޮތުން އާލިއާ ބުންޏެވެ.
އެ ފިލްމަކީ ސްރީދޭވީއާ އެކު ސަނީ ޑިއޯލް އާއި ރަޖްނީކާންތު ވެސް މުހިއްމު ރޯލްތަކެއް ކުޅުނު ވަރަށް ކާމިޔާބު ފިލްމެވެ. ވަރަށް ފޯރި ގަދަ ލަވަތަކެއް ވެސް ހިމެނޭ "ޗަލްބާޒް" އަކީ އާލިއާ، 24، އުފަން ވެސް ނުވަނީސް 1989 ގައި ރިލީޒްވި ފިލްމެކެވެ.
މި ފިލްމަކީ ސްރީދޭވީގެ އެންމެ ކާމިޔާބު އަދި މިހާރު ވެސް ވަރަށް ގިނަ ބައެއްގެ ހަނދާނުގައި ހުންނަ ފިލްމެކެވެ.
ކާމިޔާބު އެތައް ފިލްމެއް ޑައިރެކްޓްކޮށްފައިވާ ޑޭވިޑް މީގެ ކުރިން ވެސް ވަނީ ކުރީގެ ފިލްމެއްގެ ރިމެކިންއެއް ހަދައިފަ އެވެ. އެއީ 1981 ގައި ރިލީޒް ކުރި "ޗަސްމެ ބައްދޫ" އެވެ. އެ ފިލްމް އޭނާ ހެދީ 2013 ގަ އެވެ.
"ޗަލްބާޒް" ހަދާ ވާހަކަ އާލިއާ ގާތު ޑޭވިޑް ބުނި ނަމަވެސް، ފިލްމްގެ މަސައްކަތް ފަށާނެ އިރެއް އަދި ނޭނގެ އެވެ.
އާލިއާ ދެން އެންމެ އަވަހަށް ފެންނާނީ މެގްނާ ގުލްޒާރްގެ "ރާޒީ" އިންނެވެ.