އެލެކްސް އިންވެސްޓްމަންޓް ޒެފިއާ ފުޓްސަލް ކަޕް 2017ގެ ޗެމްޕިއަންކަން ސުއްޓާލައިން އިން ހޯދައިފިއެވެ.
ސުއްޓާލައިނުން ޗެމްޕިއަންކަން ހޯދީ ފައިނަލްގައި އުސްގަނޑަ އެފްސީ އާޢި ވާދަކޮށް 2-3 އިން މޮޅުވެގެންނެވެ. މިއީ ޖެހިޖެހިގެން މި މުބާރާތުގެ ޗެމްޕިއަންކަން ސުއްޓާލައިނުން ހޯދި ދެވަނަ ފަހަރެވެ.
މި މެޗްގެ ފުރަތަމަ ހާފް ނިމުނީ 1-2 އިން ސުއްޓާލައިން ކުރީގައި އޮވެގެންނެވެ. އެހެން ނަމަވެސް ދެވަނަ ހާފް ފަށައިގެން މާގިނަ އިރުތަކެއް ނުވެ އުސްގަނޑަ އިން ވަނީ ލަނޑެއް ޖަހައި މެޗްގެ ނަތީޖާ ހަމަހަމަ ކޮށްފައެވެ.
ސުއްޓާލައިން މިމެޗުން މޮޅުވި ލަނޑު ޖެހީ މެޗުގެ އެންމެ ފަހު ވަގުތުކޮޅުގެ ތެރޭގައި އެޓީމުގެ ޖާޒީ ނަމްބަރު 9، އިބްރާހިމް ސައީދު(އެޓޫ) ޖެހި ގޯލަކުންނެވެ. މެޗުގައި އެޓޫގެ ފަރާތުން ފެނުނު މޮޅު ކުޅުމުގެ ސަބަބުން އޭނާއަށް ވަނީ މެޗުގެ މޮޅު ކުޅުންތެރިޔާގެ އެވޯޑު ލިބިފައެވެ.
މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ގޯލު ޖެހި ކުޅުންތެރިޔަކަށް ހޮވިފައިވަނީ އުސްގަނޑަ ޓީމުގެ ޖާޒީ ނަމްބަރު 7، މުހައްމަދު އާލިފް ފަހުމީއެވެ. އާލިފް ވަނީ މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައިވެސް ހިމެނިފައެވެ. އޭނާގެ އިތުރުން މޮޅު ފަސް ކުޅުންތެރިންނަށް ހޮވިފައިވަނީ އުސްގަނޑަ ޓީމުގެ އަލީ ލިރުއަމް، ސްކޫޕް ކަންމަތި ޓީމުގެ އިބްރާހިމް އިންޝާލް، ސުއްޓާލައިނުގެ މުހައްމަދު ތިލްމީޒް އަދި ބޭރުމަތި ޓީމުގެ އަހުމަދު ނާޝިދު(ނައްޓޭ) އެވެ.
މުބާރާތުގެ އުއްމީދީ ކުޅުންތެރިޔާއަށް ހޮވިފައިވަނީ އެފްސީ ކޮށިފަންނަ ޓީމު ޝާޝްއެވެ. އަދި އެންމެ މޮޅު ކީޕަރަކަށް ހޮވިފައިވަނީ ސުއްޓާލައިނުގެ ކީޕަރު އިބްރާހިމް ނަސީރުއެވެ. މުބާރާތުގެ ފެއާ ޕްލޭ ޓީމަކަށް ހޮވިފައިވަނީ އެފްސީ އަފިރިންނެވެ.
ޒެފިއާ ފުޓްސަލް ކަޕް2017ގެ މެއިން ސްޕޮންސަރަކީ އެލެކްސް އިންވަސްޓްމަންޓެވެ. ބެވަރޭޖް ޕާޓްނަރުކަން ކޮކާކޯލާ އިން ނަގާފައިވާއިރު ޕްރިންޓިން ޕާޓްނަރަކީ ކޮންޓްރޯލް ޕީއެވެ. އަދި މުބާރާތުގެ މީޑިޔާ ޕާޓްނަރ އަކީ 'އައްޑޫލައިވް' އެވެ. މީގެ އިތުރުން ސްޕޯޓްސް ޕާޓްނަރ އަކީ އައިރިސް ޓްރޭޑާސް އެވެ.