2018ގެ ރިޔާސީ އިންތިހާބަށް ތައްޔާރު ވުމުގެ ގޮތުން ރައީސް އަބްދުﷲ ޔާމީންގެ ރަސްމީ ކެމްޕޭން އޮފީސް މާލޭގައި ހުޅުވައިފި އެވެ.
"ރައީސް ޔާމީން ކެމްޕެއިން އޮފީސް"ގެ ނަމުގައި މާލޭގައި ހެދި ތިން ބުރީގެ އޮފީސް ހުޅުއްވައިދެއްވީ ރޭ ބޭއްވި ރަސްމިއްޔާތެއްގައި ރައީސް ޔާމީނެވެ.
އެ އޮފީހުން މައުލޫމާތު ދީފައިވާ ގޮތުގައި ކުރިއަށް އޮތްތަނުގައި ފަސްޓް ލޭޑީ ފާތިމަތު އިބްރާހިމް އާ ގުޅުންހުރި ކަންކަން ވެސް ކުރިއަށްދާނީ ކެމްޕެއިނާ ގުޅޭ ރަސްމީ އޮފީހުގައެވެ.
ރިޔާސީ އިންތިހާބުގެ ކެމްޕޭނަށް ޕީޕީއެމުން މާލޭގެ އެކި ސަރަހައްދުތަކުގައި އެ ޕާޓީގެ ޖަގަހަތައް ހުޅުވާފައެވެ. އަދި މީގެ އިތުރުން އަތޮޅު ތެރޭގައި ވެސް އެ ޕާޓީން ގެންދަނީ ކެމްޕެއިން ޖަލްސާތައް ބާއްވަމުންނެވެ.
ޕީޕީއެމް އިން ޖަގަހަތައް ހަަދަމުންދާއިރު އިދިކޮޅު ފަރާތްތަކުން ދަނީ އެ ޖަގަހަތައް ހެދުމުގައި ދައުލަތުގެ ވަސީލަތްތަކާއި މުވައްޒަފުން ބޭނުންކުރާ ކަމުގެ ތުހުމަތު ކޮށްފައެވެ. އެކަމާއި ޕީޕީއެމްގެ ބައެއް މަޖިލިސް މެންބަރުން ދެކޮޅު ހެއްދެވި ނަމަވެސް، ޕީޕީއެމްގެ ޖަގަހަތައް ހެދުމުގައި ސަރުކާރު އޮފީސްތަކުގެ މުވައްޒަފުން ބޭނުންކުރަމުންދާ ކަމަށް ރައީސް އަބްދުﷲ ޔާމީން ވެސް ވަނީ އިއުތިރާފުވެވަޑައިގެންފައެވެ.