މެލޭޝިއާގެ ބޮޑުވަޒީރު ނަޖީބް ރައްޒާގު ރަސްމީ ދަތުރުފުޅެއްގައި ރާއްޖެ ވަޑައިގަންނަވަން ނިންމަވައިފި އެވެ.
މެލޭޝިއާގެ ފޮރިން މިނިސްޓްރީން ބުނީ ނަޖީބް ރާއްޖެ ވަޑައިގަންނަވާނީ އަންނަ ހަފުތާގެ ތެރޭގައި ކަމަށެވެ.
އެމަނިކުފާނު ރާއްޖެ ވަޑައިގަތުމުގެ ކުރިން އަންނަ އާދިއްތަ ދުވަހު ސްރީލަންކާއަށް ވަޑައިގެން އެ ގައުމުގައި ދެ ދުވަހު މަޑުކުރައްވާނެ ކަމަ ށްވެސް މެލޭޝިއާގެ ފޮރިން މިނިސްޓްރީން ބުންޏެވެ. އެހެންވެ ނަޖީބު ރާއްޖެ ވަޑައިގަންނަވާނެ ސީދާ ވަކި ދުވަހެއް އެ މިނިސްޓްރީން ނުބުނެ އެވެ.
މެލޭޝިއާގެ ބޮޑުވަޒީރު ނަޖީބް ރާއްޖެ ވަޑައިގަންނަވަނީ ރައީސް އަބްދުﷲ ޔާމީންގެ ދައުވަތަކަށް ކަމަށް އެނގިފައިވެ އެވެ.
ރައީސް ޔާމީން މެލޭޝިއާ އަށް ކުރެއްވި ދަތުރުފުޅެއްގައި އާއި ކުރީގެ ރައީސް މައުމޫން އަބްދުލް ގައްޔޫމް މެލޭޝިއާ އަށް ކުރެއްވި ދަތުރުފުޅެއްގައި ވަނީ ނަޖީބް ރައްޒާގު ރާއްޖެ ވަޑައިގަންނަވާނެ ކަމުގެ ޔަގީންކަން ދެއްވައިފަ އެވެ.
މެލޭޝިއާގެ ބޮޑުވަޒީރު ރާއްޖެ ވަޑައިގަންނަވަން މި ނިންމެވީ ރާއްޖޭގެ ސިޔާސީ ހާލަތާ ބެހޭ ގޮތުން އެ ގައުމުގެ ކުރީގެ ބޮޑުވަޒީރު މަހާތީރް މުހައްމަދަށް ރައްޔިތުންގެ މަޖިލީހުގެ މެމްބަރު އަހުމަދު މަހްލޫފް މައުލޫމާތު ހިއްސާކޮށްފައިވާ ދަނޑިވަޅެއްގަ އެވެ.