އިންޑިޔާ ސަފީރު އަކިލޭޝް މިޝްރާއާ ބައްދަލުކުރުމުގެ ސަބަބުން ގއ. ކައުންސިލްގެ ހުރިހާ ކައުންސިލަރުން ތިން މަސް ދުވަހަށް ސަސްޕެންޑުކުރުމަކީ، ރައީސް ޔާމީންގެ ސަރުކާރު "މަރަށް ތެޅޭ ތަން ފެންނަ އަލިގަދަ ހެއްކެއް" ކަމުގައި ވިލިނގިލީ ދާއިރާގެ މަޖިލިސް މެންބަރު ސައުދު ހުސައިން ވިދާޅުވެއްޖެ އެވެ.
ސައުދު ވިދާޅުވީ ގއ. ކައުންސިލް ސަސްޕެންޑް ކުރުމަކީ ސަރުކާރަށް ގޮތް ހުސްވެފައިވާ ކަމާއި މަރަށް ތެޅޭތަން ފެންނަ އަލިގަދަ ހެއްކެއް ކަމަށެވެ. އަދި ރައްޔިތުން އިންތިހާބު ކުރާ މަގާމުތަކަށް ސަރުކާޜުން ދަހިވެތިވެފައިވާ މިންވަރު ސާފުވެއްޖެ ކަމަށެވެ.
މީގެ އިތުރުން ސައުދު ވިދާޅުވެފައި ވަނީ ކިތަންމެ ބިރެއް ދެއްކިޔަސް ކައުންސިލަރުންނާއި ރައްޔިތުން ފަހަތަަކަށް ނުޖެހޭނެ ކަމަށެވެ.
ކުރިން ޕީޕީޢެމްގެ މެންބަރެއްގެ ގޮތުގައި ހުންނެވި ސައުދު އިދިކޮޅު ފަރާތްތަކާއި އެކު މަސައްކަތް ކުރައްވަން ފެއްޓެވުމުން އެބޭފުޅާ ވަނީ ޕީޕީއެމުން ވަކިކޮށްފައެވެ. އެއާއި އެކު ސައުދުގެ ގޮނޑި ގެއްލިއްޖެ ކަމަށް ނިންމައި އެ ދާއިރާގެ ބައި އިލެކްޝަން ކުރިއަށް ގެންދަން އިލެކްޝަން ކޮމިޝަނުން ވަނީ ނިންމާފައެވެ.
މަޖިލީހުގެ މެންބަރުކަމުގެ ގޮނޑި "ގެއްލިފައިވާ" ކަމަށް އިލެކްޝަންސް އިން ކަނޑައަޅާފައި ވަނިކޮށް ފާއިތުވި ޖުލައި މަހުގެ 24 ގައި މަޖިލީހަށް ވެންނެވި މައްސަލާގައި ހުއްދަ ނޫން ތަނަކަށް ވަނުމުގެ ދައުވާ އާއި ގާނޫނު ތަންފީޒުކުރާ މުވައްޒަފެއްގެ ވާޖިބަށް ހުރަސް އެޅުމުގެ ދައުވާ ސައުދުގެ މައްޗަށް ވަނީ އުފުލާފައެވެ.
މީގެ އިތުރުން ސައުދުގެ މައްޗަށް ވަނީ ޓެރަރިޒަމްގެ ދައުވާ ވެސް އުފުލައިފަ އެވެ. އެއީ ހައި ކޯޓުގެ ފަނޑިޔާރު ޝުޖާއު އުސްމާން އަވަހާރަކޮށްލަން އުޅުނު ކަމަށް ބުނެ ސައުދުގެ މައްޗަށް އުފުލާފައިވާ ދައުވާއެކެވެ.