މިދިޔަ އަހަރުގެ ތެރޭގައި ހާޓްއެޓޭކެއް ޖެހިގެން ކޯމާއެއްގައި އޮންނަތާ އެތައް ދުވަހެއްވެފައި ވަނިކޮށް އިންޑިއާގެ ޑައިރެކްޓަރު ނީރަޖް ވޯރާ މަރުވެއްޖެ އެވެ.
މީޑިއާ ރިޕޯޓްތައް ބުނާ ގޮތުން 54 އަހަރުގެ ނީރަޖް މަރުވީ ރޭ މެންދަމުގެ ވަގުތެއްގަ އެވެ.
އޭނާގެ މަރާ ބެހޭ ގޮތުން މީޑިއާތަކަށް ޕްރޮޑިއުސަރު އަޝޯކް ޕަންޑިތު ބުނީ ނީރަޖް މަރުވީ ރޭ މެންދަމު 3:00 ގައި ކަމަށާއި މަރުވީ މުމްބާއީ ކްރިޓި ކެއާ ހޮސްޕިޓަލްގައި ކަމަށެވެ.
ޑައިރެކްޓަރެއްގެ އިތުރުން އެކްޓަރެއްގެ ގޮތުގައި ވެސް ނީރަޖް ވަނީ ގިނަ ފިލްމްތަކެއްގައި މަސައްކަތްކޮށްފަ އެވެ. އޭނާ ކުޅުނު ފާހަގަކޮށްލެވޭ ބައެއް ފިލްމްތަކުގެ ތެރޭގައި "ރަންގީލާ"، "އަކޭލޭ ހަމް އަކޭލޭ ތުމް"، "ވިރާސަތު" އަދި "ޕުކާރް" ފަދަ ފިލްމްތައް ހިމެނެ އެވެ.
ދެހާސް ހައެއްގައި ރިލީޒް ކުރި "ގޯލްމާލް" އާއި "ހީރާ ޕޭރީ" ސީރީޒްގެ ފިލްމްތަކުގެ ސްކްރީންޕްލޭ ވެސް ލިޔެފައިވާ ނީރަޖް ޑައިރެކްޓްކޮށްފައިވާ ފިލްމްތަކުގެ ތެރޭގައި ޕިރް ހީރާ ޕޭރީ (2000) އާއި ކިލާޅީ 420 ހިމެނެ އެވެ.