ކުރީގެ ހޯމް މިނިސްޓަރު އުމަރު ނަސީރަކީ ހައްލެއް ނޫން ކަމަށާއި އެއި "ފެންނަން ހުރި މުސީބާތެއް" ކަމަށް ތިމަރަފުށީ ދާއިރާގެ މެންބަރު މުހައްމަދު މުސްތަފާ ވިދާޅުވެއްޖެއެވެ. މުސްތަފާ އަކީ ޕީޕީއެމުން އެދިގެން، ރައްޔިތުންގެ މަޖިލީހުގެ ގޮނޑި "ގެއްލިއްޖެ" ކަމަށް އިލެކްޝަންސް ކޮމިޝަން (އީސީ) އިން ކަނޑައަޅާފައިވާ މެންބަރެކެވެ.
މުސްތަފާ ކުރެއްވި ޓްވީޓެއްގައި ވިދާޅުވެފައި ވަނީ، އުމަރަކީ އެކުވެރި ޖަމިއްޔާތަކުގެ މަސްލަހަތު ނަގާލާ މީހެއް ކަމަށެވެ. މުސްތަފާ މިހެން ވިދާޅުވި އިރު ޖުމްހޫރީ ޕާޓީގެ ބައެއް ފަރާތްތަކުން ވެސް ގެންދަނީ އުމަރު މަސައްކަތް ކުރައްވަނީ އިދިކޮޅު ކޯލިޝަން ރޫޅާލުމަށް ކަމަށް ތުހުމަތު ކުރަމުންނެވެ. އެހެން ނަަމަވެސް އެ ތުހުމަތުތައް އުމަރު ދޮގު ކުރައްވައެވެ.
މީގެ އިތުރުން މުސްތަފާ ވިދާޅުވެފައި ވަނީ އުމަރަކީ އިސްލާހަށް މަސައްކަތް ކުރާ ފަރާތްތަކަށް އޮތް ހުރަހެއް ކަމަށާއި އަދި ސުލްހައަށް އޮތް ނުރައްކަލެއް ކަމަށެވެ.
އުމަރު ނަސީރު ޖުމްހޫރީ ޕާޓީ އާއި ގުޅިވަޑައިގަތުމާއި ގުޅިގެން ބޮޑެތި ފާޑުކިޔުންތަކެއް އޭނާ އަށް ވަނީ އަމާޒުވެފައެވެ. އެގޮތުން އުމަރަށް އެންމެ ބޮޑަށް ފާޑުވިދާޅުވަމުން ގެންދަވާ ބޭފުޅަކީ މުސްތަފާކަން ފާހަގަކޮށްލެވެއެވެ.