ސެޕްޓެމްބަރު، 19، 2003 ވަނަ ދުވަހަކީ މާފުށީ ޖަލުގައި ބަންދުކޮށްފައި ހުރި، މ.އޭޝިއާ، އުމުރުން 19 އަހަރުގެ އީވާން ނަސީމަށް ލާއިންސާނީ އެތަކެއް އަނިޔާއެއް ކުރުމަށްފަހު މަރާލި ދުވަހެވެ. އެޖަރީމާއާ އިދިކޮޅަށް ޖަލުގައި ތިބި ގައިދީންގެ ތެރެއިން ގިނަ ބަޔަކު ނިކުމެ އިހްތިޖާޖުކުރިއެވެ. އެމީހުން "ކޮންޓްރޯލްކުރުމަށް" ޖަލުގައި ތިބި ސިފައިން ބަޑިޖެހި އެވެ.
މާފުށީ ޖަލުގައި މީގެ 14 އަހަރު ކުރިން ހިނގި ބަޑިޖެހުމުގެ ހާދިސާ އަށް ތައުރީފްކޮށް ވާހަކަ ދައްކާނެ ދިވެއްސަކު ހުރެދާނެ ކަމަށް ޤަބޫލުކުރަން ދަތިވެދާނެއެވެ. އެހެން ނަމަވެސް އަޅުގަނޑުމެންގެ ތެރެއިން ބޭފުޅަކު މާފުށީ ޖަލުގައި ބަޑިޖެހި ސިފައިންނަށް ތައުރީފްކުރައްވައި ވާހަކަ ދައްކަވާފައި ވެއެވެ. އެބޭފުޅަކީ، ކުރީގެ ހޯމް މިނިސްޓަރު އުމަރު ނަސީރެވެ.
"ނުރައްކާތެރި ކުށްވެރިންތަކެއް ބަޑި ހިފައިގެން ސިފައިންގެ ކުރިމައްޗަށް އެރީމަ، ބަޑި ޖަހަންވީތޯ މައުމޫން އަބްދުލް ގައްޔޫމް ކައިރިން [ސިފައިން] އަހާކަށެއް ނުޖެހޭނެ. އެ ދުވަހު ޖެހި ބަޑިއަކީ ޖަހަން ޖެހޭ ބަޑިއެއް،" 2011 ވަނަ އަހަރު ނޮވެމްބަރު މަހުގެ 4 ވަނަ ދުވަހު އުމަރު ނަސީރު ވިދާޅުވެފައިވެއެވެ.
ނޮވެމްބަރު، 4، 2011 ވަނަ ދުވަހު، ޕީޕީއެމްގެ ހަފްލާއެއްގައި ވާހަކަ ދައްކަވަމުން އުމަރު ނަސީރު ވިދާޅުވީ، ގައުމުގެ ވެރިކަމުގައި ނުވަތަ އިސް މަގާމެއްގައި ހުންނެވި ނަމަ މާފުށީ ޖަލުގައި ބަޑި ޖެހި ސިފައިންނަށް މެޑަލް ދެއްވާނެ ކަމަށެވެ. އުމަރު މިހެން ވިދާޅުވީ، 3 ނޮވެމްބަރުގެ ހަނދާނުގައި ބޭއްވި ޖަލްސާއެއްގައި ވާހަކަ ދައްކަވަމުންނެވެ.
އުމަރު ނަސީރު އެ ޖަލްސާގައި ވިދާޅުވެފައި ވަނީ، މާފުށީ ޖަލުގައި ބަޑި ޖެހި ސިފައިންނަކީ "އެއްގޮތަކަށް ވެސް ގައުމަށް ހިޔާނާތްތެރިވި ބައެއް ނޫން" ކަމަށާއި "އެ ދުވަހު ޖެހި ބަޑިއަކީ ޖަހަން ޖެހޭ ބަޑިއެއް" ކަމަށެވެ.
މިއަދު އުމަރު ނަސީރު ހުންނެވީ ޖުމްހޫރީ ޕާޓީގެ ޓިކެޓް ލިބިވަޑައިގެންފި ނަމަ ރިޔާސީ އިންތިހާބުގައި ވާދަކުރެއްވުމަށް ތައްޔާރަށެވެ. ސުވާލަކީ 2018ގަައި އުމަރު ވެރިކަމަށް ވަޑައިގެންފި ނަމަ، މާފުށީ ޖަލުގައި ބަޑި ޖެހި މީހުންނަށް މެޑަލް ދެއްވަފާނެ ހެއްޔެވެ؟