ގދ. ގައްދޫއަށް ބޯކޮށް ވާރޭވެހި އެރަށުގެ މެޖިސްޓްރޭޓް ކޯޓުގެ ސީލިން އިން ބައެއް ވެއްޓުމާއި ގުޅިގެން ޝަރީއަތްތައް މެދުކަނޑާލައިފި އެވެ.
'އައްޑޫލައިވް' އާއި ވާހަކަ ދައްކަމުން ގައްދޫ ކޯޓުގެ މުވައްޒަފަކު ބުނީ، ސީލިންގުން ބައެއް ވެއްޓުނީ ފުރާޅުން ފެން ލީކުވެ ސީލިންއަށް ފެން ފޭބުމާއި ގުޅިގެން ކަމަށެވެ. އޭނާ ބުނި ގޮތުގައި ވެއްޓިފައިވަނީ ޝަރީޢަތް ކުރާ ރޫމުގެ ސީލިން އެވެ.
ޝަރީޢަތް ކުރާ ރޫމްގެ ސީލިން ވެއްޓުނު ހާދިސާގައި ކޯޓުގެ އެއްވެސް މުވައްޒަފަކަށް އަނިޔާއެއް ލިބިފައެއް ނުވެއެވެ. އެހެން ނަމަވެސް ކޯޓުގެ ބައެއް ތަކެއްޗަށް ވަނީ ގެއްލުން ލިބިފައެވެ.
މޫސުމާ ބެހޭ ގައުމީ އިދާރާއިން ވަނީ ދެކުނުގެ ބައެއް އަތޮޅުތަކަށް ވަރަށް ބޮޑަށް ވިއްސާރަވެ މޫސުން ގޯސްވާނެ ކަމަށް ލަފާކޮށް ޔެލޯ އެލާޓް ވެސް ނެރެފައެވެ.