މާފުށީ ޖަލުގައި ސިޔާސީ ފަރާތްތައް ބަންދުކޮށްފައި ތިބޭ ޔުނިޓް 10 މަރާމާރު ކުރަން ޖެހިގެން އެތަނުގައި ބަންދުކޮށްފައި ތިބި ސިޔާސީ ފަރާތްތައް ގޭ ބަންދަށް ބަދަލުކުރުމަކީ ވަރަށް އާންމު ކަމެކެވެ.
އެގޮތުން މިމަހުގެ 14 ވަނަ ދުވަހު، މާފުށީ ޖަލުގެ ޔުނިޓް 10ގައި ބަންދުކޮށްފައި ހުރި ކުރީގެ ޑިފެންސް މިނިސްޓަރު ކާނަލް ނާޒިމް ވަނީ ގޭބަންދަށް ބަދަލުކޮށްފައެވެ. އެކަމާއި ގުޅޭ ގޮތުން ކަރެކްޝަންގެ މީޑިއާ އޮފިޝަލް ވިދާޅުވެފައިވަނީ، ނާޒިމް ގޭބަންދަށް ބަދަލުކުރީ ޖަލު މަރާމާތުކުރުމަށް ކަމަށެވެ.
ޖަލު މަރާމާތު ކުރަން ޖެހިގެން ނާޒިމް ގޭބަންދަށް ބަދަލުކުރެއްވި އިރު، ހަމަ އެ ޔުނިޓުގައި ހުކުމް ތަންފީޒު ކުރައްވަމުން ގެންދަވާ އެހެން ބޭފުޅުން ވެސް އެބަތިއްބެވިއެވެ. ދިއްގަރު ދާއިރާގެ މެންބަރު ފާރިސް މައުމޫން، އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އަދި އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތު ވެސް ހުކުމް ތަންފީޒު ކުރައްވަނީ ހަމަ ޔުނިޓްގައެވެ.
މާފުށީ ޖަލުގެ ޔުނިޓް10 ގައި މަރާމާތު ކުރުމުގެ މަސައްކަތެއް ކުރިއަށް ގެންދާއިރު، އެ ޔުނިޓުގައި ތިބި ބައެއް ބޭފުޅުން މިނިވަން ނުކުރަނީ "މަރާމާތު" ކުރުމަށް އެބޭފުޅުން އެތަނުގައި ކޮންމެހެން ވެސް ބައިތިއްބަން ޖެހޭތީ ހެއްޔެވެ؟ ނުވަތަ ކަރެކްޝަންސް އިން އެ ކުރާ މަރާމާތެއްގައި އެބޭފުޅުން އެހީތެރިކަން ފޯރުކޮށްދެއްވަނީ ހެއްޔެވެ؟
އަދާލަތު ޕާޓީގެ މީޑިއާ ކޮމެޓީގެ މުޤައްރިރު އަލީ ނަޒީރު ވަނީ، މާފުށީ ޖަލު މަރާމާތު ކުރަނީ ގޮޅީގައި ޝައިޚް އިމްރާން ބާއްވައިގެން އެތަން މަރާމާތު ކުރާތީ ކަންބޮޑުވުން ފާޅުކުރައްވާފައެވެ. އަދި އެކަން ސާފުކޮށްދިނުމަށް އޭނާ ވަނީ އެދިވަޑައިގެންފައެެވެ.
ސިޔާސީ ގޮތުން ޤައުމު ހަލަބޮލިވެ ސަރުކާރަށް ޕްރެޝަރު ކުރިމަތިވާ ކޮންމެ ފަހަރަކު މާފުށީ ޖަލުގެ ވަކި ޔުނިޓެއް މަރާމާތު ކުރަން ޖެހުމަކީ ވެސް އަޖައިބެއް ކަހަލަ ކަމެކެވެ. އެއަށް ވުރެ ބޮޑު އަޖައިބަކީ، ޖަލުގެ ޔުނިޓް މަރާމާތު ކުރަން ޖެހޭއިރު އެތަނުގައި ވަކި ބަޔަކު ބައިތިއްބައިގެން އެ މަރާމާތު ކުރަން ޖެހުމެވެ.