އައްޑޫގެ ގިނަ ބަޔަކު މިހާރަކަށް އައިސް އެ މީހުންގެ ހަށިގަނޑުގެ ސިއްހަތު ރަނގަޅު ކުރުމަށް ނުވަތަ ހޮބީއެއްގެ ގޮތުގައި އެންމެ ގިނައިން ކުރާ އެއް ކަމަކީ ދުވަން ދިޔުމެވެ. ފާއިތުވި އަހަރެއްހާ ދުވަހު އައްޑޫގައި ބޭއްވި ދުވުންތަކަށް ލިބުނު ތަރުހީބަށް ބަލާ އިރު ދުވުމުގެ ފޯރި އޮތް މިންވަރު ހާމަވެގެން ދެ އެވެ.
އެއް ބަޔަކު ހިތަދޫ ޒޯން ސްޓޭޑިއަމްގެ ޓްރެކް އިޚްތިޔާރު ކުރާއިރު އަނެއް ބަޔަކަށް ދުވުމަށް ނިކުންނަނީ މަގުމައްޗަށެވެ. "މަރުގެ މަގު" ކަމަށް ގިނަ ބަޔަކު ސިފަކުރާ ލިންކް ރޯޑަށެވެ.
ދެހާސް އެއްވަނަ އަހަރު ލިންކް ރޯޑް ހުޅުވި ފަހުން ހިނގި އެކްސިޑެންޓްތަކުގައި އެތައް ބައެއްގެ ފުރާނަ ގެއްލިފައިވާ އިރު އެކްސިޑެންޓުތަކުގައި އަނިޔާވި ބައެއް މީހުން ނުކުޅެދޭ ހާލަތަށް ވެސް ގޮސްފައި އެބަ ހުއްޓެވެ.
ދުޅަހެޔޮ ސިއްހަތެއް ހޯދުމުގެ ނިޔަތުގައި މިފަދަ މަގަކަށް، ހެޑްސެޓް އަޅައިގެން ދުވެލަން ނިކުތުމަކީ އެންމެ ރައްކާތެރި ގޮތް ހެއްޔެވެ؟ ނުވަތަ އެއީ ތިމާ އަމިއްލަ އަށް ނުރައްކަލުގެ ތެރެއަށް ހުށަހެޅިގަތުން ހެއްޔެވެ؟
ބޫޓް ހަޑިވެދާނެތީ ދުވަނީ ތާރު މަގުގައި!
ލިންކް ރޯޑުގައި ދުވަން ދިއުމުގެ ނުރައްކާތެރި ވާހަކަ ފަށާއިރަށް އެންމެން ވެސް ބުނަނީ އެމީހުން ދުވަނީ ލިންކް ރޯޑުގެ ދެފަރާތުގައި ވިނަ ހެދިފައިވާ ސަރަހައްދުން ކަމަށެވެ. ތާރުގަނޑުގެ މަތިން ދުވާ އެއްވެސް މީހަކާއި ދިމަލެއް ނުވެއެވެ.
އެހެން ނަމަވެސް މިއީ މިކަން ހިނގާ ގޮތެއް ނޫނެވެ. ޓެކްސީ ޑްރައިވަރުންނާއި މަގުން ދަތުރުކުރާ މީހުން ސޯޝަލް މީޑިޔާގައި ހިއްސާކޮށްފައިވާ ފޮޓޯތަކުން އެކަން ވަރަށް ރަނގަޅަށް ހާމަވެއެވެ.
"ބޫޓް ހަޑިވެދާނެތީ މި ދުވަނީ ތާރުގަނޑު މަތިން. އިރުއޮއްސުމަށް ފަހު އަނދިރީގައި ވެސް ދުވަނީ. ހައި ބީމުގައި ދިޔައަސް ގިނަ ފަހަރަށް ދުވެފައިދާ މީހާ ނުފެންނާނެ. އަނެއްކާ އެންމެންނަކީ ގަވާއިދާ އެއްގޮތަށް ދުއްވާ ބައެއް ކަމުގައި ބަލައިގެން އެހެން މަގުމަތީގައި ދުވުމަކީ ނުރައްކާތެރި ކަމެއް." ޓެކްސީ ޑްރައިވަރަކު ބުންޏެވެ.
ލިންކް ރޯޑްގައި ރޭގަނޑު ނުދުވަން ފުލުހުން ވަނީ އިލްތިމާސްކޮށްފައި
ލިންކު ރޯޑުގެ މަރަދޫ އިން ފެށިގެން ހިތަދޫ އާއި ދެމެދަކީ ދުވުމަށް ދާ މީހުންގެ އެންމެ މަޤްބޫލު ސަރަހައްދެވެ. އެހެން ނަމަވެސް އެއީ އެއްވެސް ކަހަލަ އަލިކަމެއް އޮންނަ ސަރަހައްދެއް ނޫނެވެ. އެހެންވެ ލިންކުރޯޑުގައި ރޭގަނޑު ދުވުމުގެ ބަދަލުގައި ރައްކާތެރި ސަރަހައްދެއްގައި ދުވުމަށް ފުލުހުން ވަނީ މީގެ ކުރިން އިލްތިމާސްކޮށްފައެވެ.
"އެއީ އެއްވެސް އަލިކަމެއް އޮންނަ މަގެއްނޫން. އެހެންކަމުން ތިމާއާއި އެހެން މީހުންގެ ރައްކަލަކަށް އެމަގުގައި ރޭގަނޑު ނުދުވުމަކީ ފުލުހުންގެ އެދުމެއް،" -ސައުތު ޕޮލިސް ޑިވިޝަން ކޮމާންޑަރު ޗީފް އިންސްޕެކްޓަރުއޮފް ޕޮލިސް އަލީ ޝަރީފް-
'އައްޑޫލައިވް' އަށް ފުލުހުންގެ އޮފިޝަލަކު ވިދާޅުވީ އައްޑޫ ލިންކް ރޯޑުގައި ރޭގަނޑު ގަޑީގައި ދުވާ ފަރާތްތަކާއި މެދު އެއްވެސް ފިޔަވަޅެއް އަޅާފައި ނުވާ ކަމަށެވެ. އަދި ފުލުހުން މަސައްކަތް ކުރަނީ އެ ފަރާތްތަކަށް އެކަމުގެ ނުރައްކާތެރިކަން ކިޔައިދީ ނަސޭހަތްތެރިވެ މައްސަލަ ހައްލު ކުރުމަށް ކަމަށް ވިދާޅުވި އެވެ.