އައްޑޫގައި ކުނި މެނެޖް ކުރުމުގެ ހިދުމަތް ދެމުން އަންނަ ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން އައްޑޫގެ ކުނީގެ ހިދުމަތަށް މި މަހުން ފެށިގެން ބިލް ކުރަން ފަށައިފި އެވެ.
އެ ކުންފުނިން ނެރުނު ބަޔާނެއްގައި ބުނީ އައްޑޫގެ ކުނި ހިދުމަތަށް ބިލް ކުރަން ފެށީ މިއަދުން ފެށިގެން ކަމަށެވެ. އެގޮތުން އައްޑޫގެ ކަސްޓަމަރުންނަށް ހިދުމަތުގެ ބިލް އެސްއެމްއެސް މެދުވެރިކޮށް ފޮނުވަން ވަނީ ފަށައިފަ އެވެ.
ބިލް ފޮނުވަން ފެށީ ފާއިތުވި ތިން މަހުގެ ފީއާ އެކުގަ އެވެ. އެއީ ސެޕްޓެމްބަރު، އޮކްޓޯބަރު އަދި ނޮވެމްބަރަށެވެ.
މި އަހަރުގެ އެޕްރީލް މަހުން ފެށިގެން އައްޑޫގެ ކުނީގެ ހިދުމަތާ ވެމްކޯ އިން ހަވާލުވެ މިހާތަނަށް ހިދުމަތް ދެމުން އައީ އެއްވެސް އަގަކާ ނުލަ އެވެ.
އައްޑޫގައި ކުނީގެ ހިދުމަތް ހޯދަން 2،659 ގޭބިސިއަކުންނާއި 159 ވިޔަފާރިތަކުން ރަޖިސްޓްރީކޮށްފައިވެ އެވެ.
ވެމްކޯ އިން ބުނީ ހިދުމަތާ ބެހޭ އެއްވެސް މައުލޫމާތެއް ސާފު ކުރަން އެދޭ ނަމަ ހޮޓްލައި 1666 އަށް ގުޅަން އެދޭ ކަމަށެވެ.
ވެމްކޯއާ އައްޑޫގެ ކުނި މެނެޖް ކުރަން ހަވާލު ކުރީ މާޗް، 26، 2017 ގަ އެވެ. އެ ކުންފުނީގެ ހިދުމަތް އައްޑޫގައި ރަސްމީކޮށް އިފުތިތާހު ކުރީ އެޕްރީލް، 6، 2017 ގަ އެވެ.