ރައީސް އަބްދުﷲ ޔާމީންގެ ސަރުކާރަށް 4 އަހަރު ވެއްޖެއެވެ. ވެރިކަމަށް ވަޑައިގަތުމުގެ ކުރިން އަދި އޭގެ ފަހުން ވެސް އެމަނިކުފާނު ތަކުރާރުކޮށް ވިދާޅުވަމުން ގެންދަވަނީ މިއީ "ޒުވާނުންގެ ސަރުކާރެއް" ކަމަށެވެ. އަދި ޒުވާނުންގެ އިހްސާސްތައް މި ސަރުކާރަށް އެނގޭނެ ކަމަށެވެ.
ޕޯޑިއަމްތަކުގައި ކިތަންމެ ވަރަކަށް މިހެން ވިދާޅުވި ނަމަވެސް، ޒުވާނުންނާއި ގުޅުން ހުރި ބައެއް ދާއިރާތަކުން އެމީހުންގެ ކަންބޮޑުވުންތަކަށް ހައްލެއް ނުލިބެއެވެ.
އެގޮތުން އައްޑޫ ސިޓީ، ހިތަދޫ ޒުވާނުންގެ އެންމެ ބޮޑު ކަންބޮޑުވުމަކީ، ސަރުކާރަށް 4 އަހަރު ވެގެން ދިޔައިރު ވެސް ޖިމެއް ގާއިމްކޮށް ނުދެވުމެވެ. އައްޑޫއަށް ވަޑައިގަންނަވާ ސަރުކާރުގެ އިސްވެރިންނަށް އެތައް ފަހަރަކު އެވާހަކަ ކިޔައިދީފިއެވެ.
ޒުވާނުންނަށް އަޑު އިވުނީ ހަމައެކަނި "ސަރުކާރުން ހިތަދޫގައި ޖިމެއް ހަދަން ހާއްސަ އިސްކަމެއް ދީގެން މަސައްކަތް ކުރަމުން އަންނަ" ކަމަށް ބުނި ވާހަކައެވެ. ޖިމް އިކުއިޕްމަންޓް ގެނެސްދޭނެ ބަޔަކު ހޯދުމަށް 2016 ވަނަ އަހަރުގެ ތެރޭގައި އިއުލާން ވެސް ކުރިއެވެ.
އެހެން ނަމަވެސް މިއަދާއި ހަމައަށް އެ އިކުއިޕްމަންޓެއް ނުހޯދެއެވެ. ވެގެން އުޅެނީ ކީއް ކަމެއް ސާފެއް ނުވެއެވެ.
އައްޑޫގައި ޔޫތް މިނިސްޓްރީގެ ކޯޑިނޭޓަރުންތަކެއް ތިއްބެވިޔަސް ޒުވާނުންގެ މި ކަންބޮޑުވުމަށް ހައްލެއް ހޯދުމަށް އެމީހުންގެ އެހީތެރިކަމެއް ނުލިބެއެވެ.
ކޯޑިނޭޓަރުންގެ މަސައްކަތަކީ "ޝުކުރިއްޔާ ރައީސް ޔާމީން" ހިމެނޭ ޓްވީޓް ކުރުމާއި އިދިކޮޅު ފަރާތްތަކަށް އެކި ކަންކަމުގައި ރައްދު ދިނުމެވެ. ޒުވާނުންގެ ތެރެއިން ވެސް ވަކި ސިޔާސީ ފިކުރަކަށް ނިސްބަތްވާ ބަޔަކާއި ވާހަކަ ދެއްކުމާއި އެމީހުންގެ ޝަކުވާއެއް އަޑުއަހާނެ ޤާބިލްކަމެއް ނެތެވެ.