އައްޑޫގެ ގުޅިފައިވާ ރަށްތަކަށް ކަރަންޓުގެ ޚިދުމަތް ދިނުމަށް ބޭނުންކުރާ ޖަނެރޭޓަރުތަކުގެ ތެރެއިން އިއްޔެ މައްސަލަ ޖެހުނީ އިންސްޓޯލްކުރިތާ މާ ގިނަ ދުވަސް ނުވާ ޖަނެރޭޓަރަކަށް ކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
އައްޑޫގެ އެކި ހިސާބުތަކުން އިއްޔެ ކަރަންޓު ކެނޑުނީ، ފާއިތުވި އޮކްޓޯބަރު މަހުގެ 12 ވަނަ ދުވަހު އިންްސްޓޯލް ކުރި 1.1 މެގަވޯޓުގެ ޖަނެރޭޓަރެއްގައި މައްސަލަ ޖެހިގެންނެވެ. އެ ޖަނެރޭޓަރަށް މައްސަލަތަކެއް ދިމާވެފައި މިވަނީ އިންސްޓޯލް ކުރިތާ 70 ދުވަސް ތެރޭގައެވެ.
އިއްޔެ މައްސަލަ ޖެހުނު 1.1 މެގަވޯޓުގެ ޖަނެރޭޓަރަށް ދިމާވީ ކޮން މައްސަލައެއް ކަން އަދި ވަނީ ސާފުވާގޮތް ނުވެފައެވެ. އެހެން ނަމަވެސް ބައެއް ހިސާބުތަކުން އިއްޔެ މެންދުރު ފަހު ކަރަންޓު ކެނޑުނުތާ 2 ގަޑިއިރު ފަހުން އަލުން ވަނީ ކަރަންޓު ދީފައެވެ.
ފެނަކައިން އިންޖީނުގެތަކަށް ގެންނަ ޖަނެރޭޓަރުތަކުގެ ފެންވަރާއި މެދު ގިނަ ބަޔަކު ދަނީ ސުވާލު އުފައްދަމުންނެވެ. އަދި އެ ޖަނެރޭޓަރުތައް ގެނައުމުގައި ކޮރަޕްޝަނަށް މަގުފަހިވާ ގޮތަށް ކަންތައް ކުރާ ކަމަށް އިދިކޮޅު ސިޔާސީ ފަރާތްތަކުން ތުހުމަތުކުރެއެވެ.
އަދި މިއަހަރުގެ ތެރޭގައި އޮޑިޓާ ޖެނެރަލް އާންމުކުރި އޮޑިޓް ރިޕޯޓުން ވެސް ފެނަކަ ކޯޕަރޭޝަނުން ހިންގާފައިވާ ކޮރަޕްޝަނުގެ ބޮޑެތި މުއާމަލާތްތައް ވަނީ ފަޅާއަރުވާލާފައެވެ.
އެގޮތުން އިމަޖެންސީކޮށް 2014 ވަނަ އަހަރު ކުންފުނިން 38 ޖަނެރޭޓަރު ގަނެފައިވާއިރު ރިޕޯޓު ބުނާގޮތުގައި ފެނަކައިން ކޯޓޭޝަން ހޯދާފައިވަނީ ގަވާއިދާއި ޚިލާފަށް ކަމަށް އޮޑިޓް ރިޕޯޓްގައި ވަނީ ބުނެފައެވެ.