އައްޑޫގެ މަގުތައް ބެލެހެއްޓުމުގެ މަސައްކަތް ސިޓީ ކައުންސިލުން ބަލަހައްޓަމުން ގެންދިޔައިރު ވެސް މޯލްޑިވްސް ރޯޑް ޑިވޮލަޕްމަންޓް ކޯޕަރޭޝަން(އެމްއާރްޑީސީ) އާއި ދެމެދު ދެބަސްވުންތައް އުފެދެއެވެ. އޭރު ކައުންސިލުން ބުނަމުން ގެންދިޔައީ އެމްއާރްޑީސީ އަށް ކިތަންމެ ވަރަކަށް "ރިކުއެސްޓް ފޮނުވިއަސް މަގު ހަދަން ނުފަށާ" ކަމަށެވެ.
2015 ވަނަ އަހަރުގެ ތެރޭގައި ހައުސިން މިނިސްޓްރީން އައްޑޫގެ މަގު ބެލެހެއްޓުމުގެ ޒިންމާ އަދާކުރަން ފެށުމުން ވެސް އިވެނީ އެއް އަޑެކެވެ. ވެލި މަގުތައް މަރާމާތު ކުރަން ހަވާލުކުރިޔަސް "އެމްއާރްޑީސީ އަށް އެކަން ނުކުރެވޭ" ވާހަކައެވެ.
އައްޑޫ ރައްޔިތުންގެ ނަޒަރުގައި މަގުތައް ނުބެލެއްޓުމުގެ ޒިންމާ އެމްއާރްޑީސީ އައްޑޫ އޮފީހުގެ އިސްވެރިން ނަގަން ޖެހޭނެއެވެ. މަގުތައް މަރާމާތު ނުކުރެވެނީ، ނާޤާބިލު އަދި އިޚްލާސްތެރިކަމެއް ނެތް ވެރިންގެ ސަބަބުންނެެވެ.
އެހެން ނަމަވެސް މިވާހަކަތަކަށް އެމްއާރްޑީސީ އައްޑޫ އޮފީހުގެ އިސްވެރިން އެއްބަސްވާކަށް ބޭނުމެއް ނުވެއެވެ.
ފާޑުކިޔުންތަކަށް ރައްދު ދެމުން އެމްއާރްޑީސީ ވެރިން ބުނާ ވާހަކަ އަކީ މިއެވެ. "ކަންކަން ނިންމުމުގެ ބާރެއް ނެތް ބަޔަކު މިކަމުގައި ޒިންމާ ނަގަން ޖެހޭ ހެއްޔެވެ؟ އަހަރުމެން އިސްކުރެއް ގަންނަން ވެސް ޖެހެނީ، ހެޑް އޮފީހަށް ސިޓީ ލިޔައިގެން ޖަވާބަކަށް އިންތިޒާރު ކުރާށެވެ."
'އައްޑޫލައިވް' އާއި ވާހަކަ ދެއްކި އެމްއާރްޑީސީ ހިތަދޫ ސައިޓްގެ އިސް މުވައްޒަފަކު ބުނީ، އޮފީސް ހިންގުމަށް ހިނގާ އިދާރީ ޚަރަދުތަކުން ފެށިގެން ގޮސް މަގު ހެދުމާއި ހަމައަށް ކުރާ ހުރިހާ ކަމަކީ ސީދާ އެޕްރޫވްކޮށްގެން ނިންމާ ކަންކަމަށް ވުމަކީ ގޮންޖެހުމެއް ކަމަށެވެ.
"އިޚްލާސްތެރިކަން ހުއްޓަސް ކިހިނެތްތޯ ވެހިކަލަކުން ހަލާކުވާ އިސްކުރެއް ބަދަލު ކުރާނީ. މާލޭ އޮފީހުން ހުއްދަ ނުދެންޏާ؟ އަޅުގަނޑުމެންނާއި ދިމާލަށް މީހުން އެބަ ބުނޭ މިވެނި ފިހާރަަކުން ގަންނާށޭ. ސިސްޓަމްގައި އޮތް ގޮތުން އެކަން ނުކުރެވޭނެ. ކޮންމެ ބަޔަކު ތިއްބަސް ވާނީ މިހެން" އޭނާ ބުންޏެވެ.
ނަން ހާމަނުކުރުމަށް ޝަރުތުކޮށް ވާހަކަ ދެއްކި އެމްއާރްޑީސީގެ މުވައްޒަފު ބުނީ، މަގު ހެދުމަށް ބޭނުންކުރާ ވެހިކަލްތައް ވެސް ކޮންމެވެސް ބާޖަކަށް އަރުވަން ޖެހޭ ކަމަށް އޮފީސް ބަންދުވާ ފަހުން އަންނަ ފެކުހަކަށް ނުވަތަ ފޯން ކޯލަކުން އަންގާފައި އެބަހުރި ކަމަށެވެ.
އަދި އެގޮތަށް ހެދުމުގެ ސަބަބުން މަގުތައް މަރާމާތު ކުރުމަށް ހުރަސް އެޅޭ ކަމަށާއި އެެހެން ނަމަވެސް މިއީ "ރައްޔިތުންގެ ކަންފަތަށް އިވޭ އަޑުތަކެއް ނޫން" ކަމަށް އޭނާ ބުންޏެވެ.
އެމްއާރްޑީސީ ހިތަދޫ ސައިޓް އޮފީހުގެ މުވައްޒަފުންގެ މިވާހަކަތަކާއި ގުޅިގެން 'އައްޑޫލައިވް' އެމްއާރްޑީސީ ހެޑްއޮފީހުގެ އޮފިޝަލެއްގެ ބަހެއް ހޯދުމަށް ކުރި މަސައްކަތް އަދި ވަނީ ކާމިޔާބު ނުވެފައެވެ.
ދާދި ފަހުން އައްޑޫ ސިޓީ އަށް ފަސްޓް ލޭޑީ އަރިހުގައި ވަޑައިގެންނެވި ޕީޕީއެމްގެ އިސްވެރިންނާއި އެކު ބޭއްވި ބައްދަލުވުމެއްގައި އެމްއާރްޑީސީގެ ވެރިން މި ޝަކުވާތައް ހުށަހެޅިއެވެ. އެހެން ނަމަވެސް، އެކަން އެގޮތަށް ކޮށްދެވެން ނެތް ވާހަކަ އެ ބައްދަލުވުމަގައި ބައިވެރިވި ޕީޕީއެމްގެ އިސްވެރިން ވަނީ ވިދާޅުވެފައެވެ.
ސަބަބެއް ކަމުގައި ބުނެފައި ވަނީ، އައްޑޫގައި ތިބޭ އެމްއާރްޑީސީގެ މުވައްޒަފުން "އަޑިނޭނގޭ ކަންތަކެއް ހިންގާ ކަމުގެ ޝަކުވާ ލިބުން" ކަމަށެވެ.