އައްޑޫގެ ބައެއް އަވަށްތަކަށް މިހާރު ވެސް މީހުން ވަޅުލާން ސަހަރާގެ ދަތިކަން ކުރިމަތިވެފައި ވަނިކޮޮށް، އާ ސަހަރާއެއް ހަދަން ނިންމައި، އެ މަސައްކަތްކޮށް ދޭނެ ބަޔަކު ހޯދަން އިސްލާމިކް މިނިސްޓްރީން އިއުލާންކޮށްފި އެވެ.
އެ މިނިސްޓްރީން ބުނީ އަލަށް ހަދާ ސަހަރާގެ ވަށާ ފާރު ރޭނުމާއި، ގަސްތައް ނަގައި ސާފުކޮށް، ވެލި އަޅައި ފަސްގަނޑު އެއްވަރުކޮށް ދިނުމުގެ މަސައްކަތް ކޮށްދޭނެ ފަރާތެއް ހޯދަން ބޭނުންވާ ކަމަށެވެ.
އެހެންވެ މިކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 8 ވަނަ ދުވަހާ ހަމައަށް ވަނީ ހުޅުވާލައިފަ އެވެ.
މިކަމާ ބެހޭ ގޮތުން މައުލޫމާތު ދިނުން މި މަހުގެ 30 ވަނަ ދުވަހު އައްޑޫ ސިޓީ ކައުންސިލް އިދާރާގައި ހުންނަ އިސްލާމިކް މިނިސްޓްރީގެ ޔުނިޓްގައި އޮންނާނެ އެވެ. އެ ސެޝަން ފަށަން ހަމަޖެހިފައި ވަނީ އެ ދުވަހު ހެނދުނު 10:30 ގަ އެވެ.
އައްޑޫގެ ބައެއް އަވަށްތަކުގެ ސަހަރާތައް ފުރި މިހާރު މީހުން ވަޅުލަމުން އަންނަނީ މަތިމައްޗަށެވެ.