ދުންފަތުގެ އިސްތިއުމާ ކުރުމަކީ ސިއްހަތަށް ވަރަށް ގެއްލުން ހުރި ކަމެވެ. އެކަން އެނގި ތިބެ ވެސް ބައެއް މީހުންނަށް މިއާދަޔާ ދުރުވެވޭ ގޮތެއް ނުވެ އެވެ. ސަބަބަކީ ދެވި ހިފުމެވެ.
ދުންފަތުގެ އިސްތިއުމާލު ކުރުމުން ސިއްހީ ތަފާތު ގިނަ މައްސަލަތައް ކުރިމަތިވެ، ނުރައްކާތެރި ބައެއް ބަލިތައް ވެސް ޖެހުމުގެ ފުރުސަތު ބޮޑެވެ. އެހެންވެ ދުންފަތުގެ އިސްތިއުމާލު ނުކުރާށެވެ. އަދި މިކަން ކަށީގައި ހިފާފައި ހުރި ނަމަ ހުއްޓައިލެވޭތޯ މަސައްކަތް ކުރަން ޖެހެ އެވެ.
އެކަން ކުރަން އުނދަގޫ ނަމަ، މި ދެވިހިފުމުން ހަށިގަނޑަށް ލިބޭ ބައެއް ގެއްލުންތައް ކުޑަ ކުރެވޭނެ ގޮތަކަށް ކެއުމުގެ ވައްޓަފާޅި ބަހައްޓަން ޖެހެ އެވެ.
ދުންފަތުގެ އިސްތިއުމާލު ކުރުމުން ފުރަމެއަށް ޖެހޭ މައްސަލަތައް ގިނަވެ، ފުރަމޭ ހަލާކުވާލެއް އަވަސްވެ އެވެ.
ފަހުގެ ދިރާސާއެއްގައި މިހާރު ބުނަމީ ދުންފަތުގެ އިސްތިއުމާލު ކުރާ މީހުންގެ ފުރަމޭ އަށް ލިބޭ ގެއްލުން ކުޑަ ކުރުމަށް އާފަލާއި ޓޮމާޓޯ ކެއުން އާދަ ކުރަން ޖެހޭ ކަމަށެވެ.
ހާއްސަކޮށް އެ ދެ ބާވަތުގެ ސަބަބުން ފުރަމޭގެ ނުރައްކާތައް ކުޑަކޮށްދެ އެވެ.
އެމެރިކާގެ ޖޯންސް ހޮޕްކިންސް ބްލޫމްބާގް ސްކޫލް އޮފް ޕަބްލިކް ހެލްތުން ހެދި ދިރާސާގައި ބުނަނީ ދުންފަތުގެ އިސްތިއުމާލު ކުރާ މީހުންގެ ކޮންމެ ދުވަހެއްގެ ކެއުމުގައި މަތީ މިންވަރަކަށް އާފަލާއި ޓޮމާޓޯ ބޭނުން ކުރާ ނަމަ، ފުރަމޭ އަށް ލިބޭ ގެއްލުންތައް އެތައް އަހަރަކަށް ފަސްކޮށްލާ ކަމަށެވެ.
އެހެންވެ އެފަދަ މީހުން ދުވާލެއްގެ މަދުވެގެން ދެ ޓޮމާޓޯ ނުވަތަ ތިން އާފަލު ބޭނުން ކުރުން މުހިއްމު ކަމަށް ދިރާސާ އިން ދައްކަ އެވެ.
އެ ދިރާސާގައި އަދި ބުނަނީ އެ ބާވަތްތައް ބޭނުން ކުރުން އެންމެ ރަނގަޅީ ވެސް ތާޒާކޮށް ކަމަށެވެ.