އިންތިހާބުތަކުގައި ވޯޓުލުމަށް ވޯޓު ފޮށި ކައިރިއަށް ދާއިރު ރައްޔިތުން އެމީހުންގެ ބުއްދީގެ ބޭނުން ކުރަން ޖެހޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވެފައި ވަނީ، އުތުރުގެ ތިން އަތޮޅަކަށް އިއްޔެ ފެއްޓެވި ދަތުރުފުޅުގައި ޅ. ހިންނަވަރަށް ވަޑައިގެން ބޯފެނުގެ ނިޒާމް އިފްތިތާހުކޮށްދެއްވުމަށް ފަހު، ވާހަކަފުޅު ދައްކަވަމުންނެވެ.
ވޯޓު ފޮށި ކައިރިއަށް ދާއިރު ބުއްދީގެ ބޭނުން ކުރަން ޖެހޭނެ ކަން ފާހަގަކުރައްވައި ރައީސް ޔާމީން ވަނީ، ވޯޓު ލާއިރު ބޭނުންކުރާނެ ތިން ފޯމިއުލާއެއް ވިދާޅުވެދެއްވާފައެވެ.
"އިސްލާމީ މުޖުތަމައެއްގައި އިސްލާމީ އަގީދާގެ މަތީގައި ދެމިތިބެން ބޭނުންވާ ކަމަށް ވަންޏާ ފުރަތަމަ ސުވާލުން ފޭލްވާނެ ލީޑަރުން އަޅުގަނޑުމެންގެ ތެރޭގައި ތިއްބެވި ކަން ތިބޭފުޅުންނަށް އެނގިވަޑައިގަންނަވާނެ،" ރައީސް ވިދާޅުވި އެވެ.
ރައީސް ޔާމީން ވިދާޅުވީ، އެފަދަ ބޭފުޅުންގެ ނަން ވޯޓު ކަރުދާހުގައި އޮވެއްޖެ ނަމަ ރަސްގެލުމުން، އިހްތިޔާރީ ޖަވާބުތައް މަދުވާނެ ކަމަށެވެ.
ދެ ވަނަ ފޯމިއުލާ އަކަށް ރައީސް ވިދާޅުވިީގޮތުގައި، މި "ސިޔާސީ މޫސުމުގައި" ސިޔާސީ ލީޑަރުން ދައްކަވާ ވާހަކަތާ މެދު ވިސްނެވުމެވެ.
އަދި ތިންވަނަ ކަމެއްގެ ގޮތުގައި ވިދާޅުވީ، ސިޔާސީ ބޭފުޅަކު އެ ދައްކާ ވާހަކައަކީ އަމަލީ ގޮތުން އެކަމެއް ތަންފީޒު ކުރެވޭ ވަރުގެ ތަޖުރިބާއަކާއި އިލްމަކާއި ހުނަރުވެރިކަމެއް ހުރި މީހެއްތޯ ބަލާލުން ކަމަށެވެ.
ރައީސް ޔާމީން ވިދާޅުވީ އެ ތިން ފޯމިއުލާގެ ތެރެއިން އެންމެ ކަމަކުން ފޭލްވެއްޖެ ވެރިއަކީ ވެސް ރައްޔިތުންނާ ގުޅޭނެ ވެރިއެއް ނޫން ކަމަށެވެ.