އައްޑޫގެ ކުޅިވަރު އާލާކޮށް ދިރުވަން މަސައްކަތް ކުރުމަށް އައްޑޫ ސިޓީ ކައުންސިލުން އެކުލަވައި ސްޕޯޓްސް ކައުންސިލްގެ ރައީސަކަށް މަރަދޫ ސުލްތާން ސައީދު އަދި ނައިބަކަށް ފޭދޫ އަލީ ހަނީޒް (ބޮއްކާ) ހަމަޖައްސައިފި އެވެ.
އެ މަގާމުތަކަށް އެ މީހުން އިންތިހާބު ކުރީ ސްޕޯޓްސް ކައުންސިލްގައި ނެގުނު ސިއްރު ވޯޓަކުން ކަމަށް ކައުންސިލުން ބުންޏެވެ.
ބޮއްކާއަކީ އެންމެ ފަހުން ބޭއްވި ލޯކަލް ކައުންސިލް އިންތިހާބުގައި ފޭދޫ ގޮނޑި އަށް ޕީޕީއެމް ޓިކެޓްގައި ވާދަކޮށް، ނާކާމިޔާބުވެފައިވާ މީހެކެވެ. އެކަމަކު އޭނާއަކީ އައްޑޫގެ ފުޓްބޯޅައިގައި ވަރަށް ހަރަކާތްތެރި ދައުރެއް އަދާ ކުރާ މީހެކެވެ.
އައްޑޫ ސްޕޯޓްސް ކައުންސިލަކީ އައްޑޫގެ ކްލަބު/ޖަމްއިއްޔާތަކުން އިންތިޒާމްކޮށްގެން ބާއްވާ އެކިއެކި ކުޅިވަރު މުބާރާތްތަކާއި އައްޑޫން ޓީމްތައް ބައިވެރިވާ މުބާރާތްތަކުގައި ކައުންސިލަށް ލަފާދީ އެހީތެރިވުމަށްޓަކައި އެކުލަވާލާފައިވާ ކައުންސިލެކެވެ.
ސްޕޯޓްސް ކައުންސިލަށް މެމްބަރުން ކަނޑައެޅުމުގައި ތަފާތު އެކި ދާއިރާތަކުގެ ކުޅިވަރު ހަރަކާތް ހިންގުމަށް ރަޖިސްޓްރިކޮށްގެން ހިންގާ ކްލަބު/ޖަމްއިއްޔާ، އެސޯސިއޭޝަންތަކުގައި މަސައްކަތް ކުރާ ފަރާތްތަކަށް އިސްކަންދެ އެވެ.
އައްޑޫގައި ސްޕޯޓްސް ކައުންސިލެއް އެންމެ ފުރަތަމަ އެކުލަވާލަން ނިންމީ 2013 ގަ އެވެ. އެއީ ހަތް މެމްބަރުން ހިމެނޭ ގޮތަށެވެ.