"ކްރިޝް" ގެ ފިލްމްތަކުގައި ރިތިން ރޯޝަން ދައްކަމުން އަންނަނީ ސްޕަހީރޯ ކެރެކްޓާއަކީ އާންމުންގެ މެދުގައި ވަރަށް މަގުބޫލު ކެރެކްޓާއެކެވެ. މި ފްރެންޗަައިޒްގެ ހަތަރު ވަނަ ބައި 2019 ގައި ބެލުންތެރިންނާ ހަމަ އަންނާނެކަން މިހާރު ވަނީ އިއުލާން ވެސް ކޮށްފަ އެވެ.
އެކަމަކު މި ފަހަރު ދައްކަން މި އުޅެނީ "ކްރިޝް 4" ގެ ވާހަކައެއް ނޫނެވެ. ރިތިކް ސްޕަހީރޯއެއްގެ ރޯލް ކުޅޭ އެހެން ފިލްމެއްގެ ވާހަކަ އެވެ.
ރިޕޯޓްތައް ބުނާ ގޮތުން ބޮލީވުޑްގެ މިހާރު އެންމެ ކާމިޔާބު ޒުވާން އެކްޓަރު ވަރުން ދަވަންގެ ބޭބެ ރޯހިތު ދަވަން ޑައިރެކްޓް ކުރާ ތިން ވަނަ ފިލްމަކީ ރިތިކް ލީޑް ރޯލް ކުޅޭ ސްޕަހީރޯ ފިލްމެކެވެ.
މީގެ ސްކްރިޕްޓް ލިޔުމުގެ މަސައްކަތް މިހާރު ކުރަމުން އަންނަ ކަމަށްވެ އެވެ.
ފިލްމާ ބެހޭ އެއްވެސް ވާހަކައެއް އަދި ރަސްމީކޮށް އެއްވެސް ފަރާތަކުން ދައްކާފައި ނުވާ އިރު، މިއީ ވީއެފްއެކްސް އާއި ސީޖީއައިގެ އެންމެ ފަހުގެ ޓެކްނޮލޮޖީ ބޭނުންކޮށްގެން ހަދާނެ ވަރަށް ވަރުގަދަ ފިލްމެއް ކަމަށްވެ އެވެ.
"ދޭސީ ބޯއިސް" އިން ޑައިރެކްޝަނަށް ނިކުތް މަޝްހޫރު ޑައިރެކްޓަރު ޑޭވިޑް ދަވަންގެ ދޮށީ ފިރިހެން ދަރިފުޅު ރޯހިތު އެންމެ ފަހުން ގެނެސް ދިން ފިލްމަކީ ވަރުން އާއި ޖޯން އަބްރަހަމް ލީޑް ރޯލް ކުޅެ މިދިޔަ އަހަރު ރިލީޒް ކުރި "ޑިޝޫމް" އެވެ.
ރިތިކްގެ ކުރިއަށް ހުރި ފިލްމްތަކުގެ ތެރޭގައި ޑައިރެކްޓަރު ވިކާސް ބަލްގެ "ސްޕަ 30" އާއި ޔާޝް ރާޖް ފިލްމްސް (ވައިއާރްއެފް) ގެ ފިލްމެއް ހިމެނެ އެވެ.