އައްޑޫ ސިޓީ ހިތަދޫ ލިންކް ރޯޑްގައި އެންވަޔަރަމަންޓް މިނިސްޓްރީގެ ޕިކަޕް ޓްރަކަކާއި ސައިކަލެއް ޖެހި އެކްސިޑެންޓުގައި ބޮލަށް ސީރިއަސް އަނިޔާތަކެއް ލިބުނު ކުއްޖާ ނިޔާވެއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ނިޔާވެފައިވަނީ ގދ.ވާދޫ އަށް ނިސްބަތްވާ އުމުރުން 13 އަހަރުގެ ކުއްޖެކެވެ. އޭނާ ނިޔާވިކަން ހިތަދޫ ހޮސްޕިޓަލް ހިންގެވުމާއި ހަވާލުވެ ހުންނެވި މުހައްމަދު ނަޖީބު ވަނީ ކަށަވަރުކޮށް ދެއްވާފައެވެ.
13 އަހަރުގެ ކުއްޖާ ނިޔާވިއިރު އޭނާ އިތުރުފަރުވާއަށް މާލެ ފޮނުވުން ލަސްވީ ފްލައިޓުން ޖާގަ ނުލިބިގެންނެވެ. ހޮސްޕިޓަލުން މަސައްކަތް ކޮށްގެން ވެސް ޖާގައެއް "ނުލިބުމުން" ފްލައިޓުން ޖާގައެއް ހަމަޖެހޭތޯ އާއިލާގެ ފަރާތުން ދިޔައީ މަސައްކަތް ކުރަމުންނެވެ.
މީގެ އިތުރުން އެވަގުތު ސައިކަލް ދުއްވަން އިން އުމުރުން 21 އަހަރުގެ ޒުވާނާއަށް ވެސް ސީރިއަސް ޒަޚަމްތަކެއް ލިބިފައިވާއިރު އޭނާއަށް ވެސް ހިތަދޫ ރީޖަނަލް ހޮސްޕިޓަލުގައި ދަނީ ފަރުވާދެމުންނެވެ.
އޭނާ ވެސް އިތުރު ފަރުވާއަށް މާލެ ފޮނުވުމަށް ޑޮކްޓަރުން ލަފާދީފައި ވާއިރު އަދިވެސް ފްލައިޓުން ޖާގައެއް ހަމަ ނުޖެހެއެވެ.
މިއަދު ހެނދުނު 10 ޖަހާއިކަށް ހާއިރު މި އެކްސިޑެންޓް ހިނގާފައި ވަނީ ބާރު ސްޕީޑްގައި ދުއްވާފައި ދިޔަ އެންވަޔަރަމަންޓް މިނިސްޓްރީގެ ވެހިކަލް ކޮންޓްރޯލް ނުކުރެވިގެން ގޮސް ސައިކަލުގައި ޖެހިގެންނެވެ.