ސިންގަޕޫރުގެ ކްރެސެންޑާސް ގްރޫޕުން ރިސޯޓެއްގެ ގޮތުގައި ތަރައްގީ ކުރާ ސ. ހަންކެޑެއިގެ އެންވަޔަރަމަންޓް އިމްޕެކްޓް އެެސެސްމަންޓް (އީއައިއޭ) އެ ކުންފުނިން ހަދަން ފަށާފައިވާ ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލްގެ އޮފިޝަލަކު ވިދާޅުވީ ކްރެސެންޑާސްގެ ޓީމެއް އައްޑު އަށް އައިސް އެ މީހުންގެ މަސައްކަތް މިހާރު ފަށާފައިވާ އިރު، އީއައީގެ ހުއްދަ ވަރަށް އަވަހަށް ލިބޭނެ ކަމަށެވެ. އެ ހިސާބުން ހަންކެޑެ ތަރައްގީ ކުރުމުގެ އަމަލީ މަސައްކަތް ފެށޭނެ ކަމަށް ވެސް ކައުންސިލުން ބުންޏެވެ.
ކައުންސިލުން މި މަހުގެ 21 ވަނަ ދުވަހު، ހަންކެޑެ ޕްރޮޖެކްޓާ ގުޅޭ ގޮތުން ވަނީ ކްރެސެންޑާ އާ އެކު ބައްދަލުވުމެއް ވެސް ބާއްވާފަ އެވެ.
އެ ކުންފުނިން އީއަައިއޭގެ މަސައްކަތް ފަށާފައިވާ އިރު ހަންކެޑެ އިރުމަރީ ފަރާތުގައި އޮތް ލިންކް ރޯޑް ރަށުގެ ހުޅަނގު ފަރާތަށް ބަދަލު ކުރަން ވެސް ވަނީ ނިންމާފަަ އެވެ. އެ މަސައްކަތް ކުރަން ހަމަޖެހިފައި ވަނީ ސްރީ ލަންކާގެ ކޮންސްޓްރަކްޝަން ކޮންސޯޓިއަމް (އައިސީސީ) އިން ކަމަށް ވެސް ކައުންސިލުން ބުންޏެވެ.
އަންނަ އަހަރު ހުޅުވުމަށް ހަމަޖެހިފައިވާ ހަންކެޑެއިގައި ތަރައްގީ ކުރާނީ 100 ކޮޓަރީގެ 200 އެނދުގެ ފަސްތަރީގެ ރިސޯޓެއް ކަމަށް ކްރެސެންޑާސް އިން ބުންޏެވެ.