ކާމިޔާބު ފިލްމްތަކެއް ގެނެސް ދީފައިވާ ޑައިރެކްޓަރު ޑޭވިޑް ދަވަން 1999 ގައި ގެނެސް ދިން ހިޓް ފިލްމް "ބީވީ ނަމްބަރު 1" ގެ ރިމެކިންއެއް ހަދަން އުޅޭ ކަމަށް ދެކެވޭ ވާހަކަތައް އޭނާ ދޮގުކޮށްފި އެވެ.
އެ ފިލްމަކީ ސަލްމާން ހާނާއި ކަރިޝްމާ ކަޕޫރް، ސުޝްމިތާ ސެން، އަނިލް ކަޕޫރް އަދި ތައްބޫ މުހިއްމު ރޯލްތައް ކުޅެފައިވާ ވަރަށް ރީތި ފިލްމެކެވެ.
އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި "ބީވީ ނަމްބަރު 1" ގެ ރިމެކިންއެއް ހަދަން ޑޭވިޑް ނިންމާފައި ވަނީ ސަލްމާން ކުޅުނު ރޯލަށް އޭނާގެ ދަރިފުޅު ވަރުން ދަވަން ލައިގެންނެވެ.
ޑޭވިޑް ޑައިރެކްޓްކޮށް، ސަލްމާން ޑަބަލް ރޯލް ކުޅުނު 1997 ގެ ފިލްމް "ޖުޅްވާ" ގެ ދެވަނަ ބައި ވަރުންއާ އެކު މި އަހަރު ޑޭވިޑް ވަނީ ގެނެސް ދީފަ އެވެ.
އެ ފިލްމަކީ މި އަހަރުގެ އެންމެ ކާމިޔާބު އެއް ފިލްމް ވެސް މެ އެވެ.
ނަމަވެސް ޑޭވިޑް ބުނީ "ބީވީ ނަމްބަރު 1" ރިމެކިންއެއް ހެދުމުގެ ހިޔާލެއް ނުގެންގުޅޭ ކަމަށެވެ.
"އަހަރެން ދެން ހަދާނެ ފިލްމަކާ ދޭތެރޭ ނުވެސް ވިސްނަން. ހިނގާބަލަ އާ އަހަރު ފެށެންދެން މަޑުކޮށްލަމާ. މިހާރު މިއުޅެނީ ޗުއްޓީ މޯޑްގައި،" 45 އަށް ވުރެ ގިނަ ފިލްމް ހަދާފައިވާ ޑައިރެކްޓަރު ބުންޏެވެ.
އޭނާ ބުނީ އާ ފިލްމަކާ ދޭތެރޭ ހިޔާލު ކުރަން ފަށާނީ އާ އަހަރު ފެށި ހުރިހާ ކަމެއް ހަމައަކަށް އެޅުމުން ކަމަށެވެ.
ޑޭވިޑް، 62، އަކީ އާންމުކޮށް ލޯބީގެ ކޮމެޑީ ފިލްމްތައް ހަދަން މަޝްހޫރު ޑައިރެކްޓަރެކެވެ. އޭނާގެ ގިނަ ފިލްމްތައް ކުޅެފައި ވަނީ ގޯވިންދާ އާއި ސަލްމާނެވެ.