އައްޑޫ ސިޓީ ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ ސާވާ ޑައުންވުމުގެ ސަބަބުން މީގެ އެތައް އަހަރެއް ކުރިން ފެށިގެން ބަލަހައްޓަމުން ބަލިމީހުންގެ މެޑިކަލް ރިކޯޑްސް ތައް ގެއްލިއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މެޑިކަލް ރިކޯޑްސްތައް ގެއްލުނީ ހޮސްޕިޓަލުގެ ސާވާ އަށް ދިމާވި މައްސަލަތަކަކާއި ގުޅިގެންނެވެ. ސާވާ އަށް މައްސަލަ ދިމާވެފައި ވަނީ ޑިސެމްބަރު މަހުގެ 19 ހިސާބުގައެވެ.
ހިތަދޫ ހޮސްޕިޓަލް ހިންގެވުމާއި ހަވާލުވެ ހުންނެވި ސީނިއަރ ކޮމިއުނިޓީ ހެލްތް އޮފިސަރ މުހައްމަދު ނަޖީބު ވެސް ވަނީ ސާވާ ޑައުންވުމުގެ ސަބަބުން މެޑިކަލް ރިކޯޑްސް ގެއްލިފައިވާ ކަން ކަށަވަރުކޮށް ދެއްވާފައެވެ.
ނަޖީބު ވިދާޅުވި ގޮތުގައި، ސާވާ ޑައުންވެ ގެއްލުނު ޑޭޓާތަކުގެ ތެރެއިން ކޮންމެވެސް ވަރެއް ރިކަވާ ކުރެވިފައިވާ ކަމަށެވެ. އޭނާ ވިދާޅުވި ގޮތުގައި ސާވާ ޑައުންވެފައި ވަނީ ހާޑްވެއަރ ފެއިލިއާ އެއްގެ ސަބަބުން ކަމަށެވެ.
1984 ވަނަ އަހަރު ހުޅުވި ހިތަދޫ ހޮސްޕިޓަލުގެ މެޑިކަލް ރިކޯޑުތައް ރިކަވާ ނުކުރެވިއްޖެ ނަމަ އެއީ ވަރަށް ބޮޑު ގޮންޖެހުމަކަށް ވާނެއެވެ. އެ ރެކޯޑްތަކަކީ ހޮސްޕިޓަލުން ފަރުވާ ހޯދާ ބަލިމީހުންނާއި ގުޅޭ މުހިއްމު މައުލޫމާތު ތަކެކެވެ. ބަލިމީހުންނަށް ފަރުވާ ދިނުމުގައި އެ މައުލޫމާތަކީ ޑޮކްޓަރުންނަށް ވަރަށް ބޭނުންތެރި މައުލޫމާތު ތަކެކެވެ.
"ކޮންމެ މީހެއްގެ ވެސް ރިކޯޑްތައް އެންޓާ ކުރަން ފަށާނީ އަލުން. އެއްވެސް ރިކޯޑެއް ނެތް. މާނައަކީ އަލުން ޕޭޝަންޓު ރަޖިސްޓަރ ކުރަންށޭ ޖެހޭނީ. މީގެ ކުރިން ޑޮކްޓަރަށް ދެއްކިޔަސް އެ މައުލޫމާތެއް މިހާރު ހޮސްޕިޓަލުގައި ނެތް" ނަން ހާމަނުކުރުމަށް ޝަރުތުކޮށް ވާހަަކަ ދެއްކި ހޮސްޕިޓަލުގެ ސީނިއަރ މުވައްޒަފަކު ބުންޏެވެ.
އޭނާ ބުނި ގޮތުގައި ސާވާ ޑައުން ވުމުގެ ސަބަބުން ބަލިމީހުންނަށް ފަރުވާދިނުމުގައި ޑޮކްޓަރުންނަށް ވެސް ބޮޑެތި ދަތިތަކާއި ކުރިމަތިލާން ޖެހިފައިވާ ކަމަށެވެ.