ސަލްމާން ސޮއިކޮށްފައި ހުރި އެހެން ފިލްމްތަކެއްގެ މަސައްކަތުގައި ވަރަށް ބިޒީކޮށް އުޅެން ޖެހުމުން އަންނަ އަހަރު މަސައްކަތް ފަށާނެ ކަމަށް ބެލެވުނު ފިލްމް "ދަބަންގް 3" މުއްދަތެއް ނެތް ގޮތަށް ފަސްކޮށްފި އެވެ.
ކުރިން ރާވާފައި އޮތް ގޮތުން ޕްރަބޫދޭވާ ޑައިރެކްޓް ކުރާ މި ފިލްމްގެ ޝޫޓިން އަންނަ މާޗަށް އޮތީ ތާވަލްކޮށްފަ އެވެ. ނަމަވެސް ސަލްމާން މިހާރު ކުޅެމުން އަންނަ "ރޭސް 3" އާއި އަލަށް މަސައްކަތް ފަށަން ތައްޔާރުވަމުން އަންނަ "ބާރަތު" އަށް ވަގުތު ދިނުމުގެ ގޮތުން "ދަބަންގް 3" ފަސްކޮށްލީ އެވެ.
.@TSeries and @atulreellife will produce @BeingSalmanKhan's next #Bharat directed by @aliabbaszafar. pic.twitter.com/HPgAFlrZo3
— TSeries (@TSeries) December 27, 2017
"ބާރަތު" އަކީ ސަލްމާންގެ ޅިޔަނު އަތުލް އަގްނިހޯތުރީ އާއި ޓީ ސީރީޒް ގުޅިގެން ޕްރޮޑިއުސްކޮށް، މިހާރު ސިނަމާގައި އޮތް ސަލްމާންގެ އެންމެ ފަހުގެ ފިލްމް "ޓައިގާ ޒިންދާ ހޭ" ގެ ޑައިރެކްޓަރު އަލީ އައްބާސް ޑައިރެކްޓް ކުރާ ފިލްމެކެވެ.
މީގެ އިތުރުން "ދަބަންގް ވޯލްޑް ޓުއާ" އަށް ވެސް ވަގުތު ދޭން ޖެހޭތީ ސަލްމާނަށް މާ ކައިރި މުސްތަގުބަލެއްގައި "ދަބަންގް 3" ފެށޭކަށް ނެތެވެ. އެކަން އޭނާގެ ކޮއްކޮ އަދި ޕްރޮޑިއުސަރު އަޒްބާން ހާން ވެސް ވަނީ ކަށަވަރުކޮށް ދީފަ އެވެ.
"ދަބަންގް 3" ވެގެން ދާނީ 2009 ގައި ރިލީޒް ކުރި "ވޯންޓެޑް" އަށް ފަހު ޕްރޫބޫދޭވާ ޑައިރެކްޓް ކުރާ ފިލްމެއް ސަލްމާން ކުޅޭ ފުރަތަމަ ފިލްމެވެ.
ސަލްމާން ފުލުހެއްގެ ރޯލުން ފެނިގެންދާ "ދަބަންގް" ފްރެންޗައިޒްގެ ފުރަތަމަ ފިލްމް ދަބަންގް (2010) ޑައިރެކްޓް ކުރީ އަބިނާވް ކެޝަޕް އެވެ. އަދި ދެވަނަ ބައި 2012 ގައި ޑައިރެކްޓް ކުރީ އަރްބާޒެވެ.
މި ދެ ފިލްމްގައި ބަތަލާގެ ރޯލް ކުޅުނީ ސޮނާކްޝީ ސިންހާ ކަމަށް ވިޔަސް "ދަބަންގް 3" ގައި އޭނާގެ އިތުރުން އެހެން ބަތަލާއަކު ވެސް ހިމެނެ އެވެ. އެއީ "ނާގިން" ފަދަ ޓީވީ ސިލްސިލާތައް ކުޅެފައިވާ މޯނީ ރޯއި އެވެ.