ކުރިން މި މަހުގެ އެކެއްގައި ރިލީޒް ކުރަން ތާވަލް ކުރި ސަންޖޭ ލީލާ ބަންސާލީގެ ލޯބީގެ ތާރީހީ ފިލްމް "ޕަދްމާވަތީ" އަށް ދިމާވި މައްސަލަތަކާ ހުރެ ސެންސަރު ބޯޑްގައި ތާށިވެ، އެންމެ ފަހުން ފިލްމް ސެންސަރުކޮށް ނިންމައި ދޭން ނިންމި އިރު ފިލްމްގެ ނަން ބަދަލުކޮށްފި އެވެ.
ދީޕިކާ ޕަދްކޯނާއި ޝާހިދު ކަޕޫރް އަދި ރަންވީރް ސިންގް ލީޑް ރޯލް ކުޅެފައިވާ ފިލްމަށް ދޭން ސެންސަރު ބޯޑުން ފާސްކޮށް ދޭން ނިންމީ "ޕަދްމާވަތު" ގަ ނަމުގަ އެވެ. އަދި ފިލްމަށް ޔޫއޭ ސެޓްފިކެޓް ދޭން ނިންމި ނަމަވެސް ފިލްމަށް ބައެއް އެހެން ޝަރުތުތަކެއް ވެސްކޮށްފައިވެ އެެވެ.
އޭގެ ތެރޭގައި ފިލްމްގައި ހިމެނޭ "ގޫމަރް" ލަވައިގެ ޅެމުގެ ބައެއް ލަފުޒުތައް ބަދަލު ކުރަން ޝަރުތުކޮށްފައިވެ އެވެ.
ނަމަވެސް މި ބަދަލުތަކަށް ބަންސާލީ އެއްބަސްވި ކަމެއް އަދި ކަށަވަރެއް ނުވެ އެވެ.
ފިލްމް ސެންސަރުކޮށް ދޭން ނިންމީ މި ފލްމާ ގުޅޭ ގޮތުން ތަފާތު އެކި މަރުހަލާތަކުގައި މައްސަލަ ޖެއްސި ބައެއް މީހުން ހިމެނޭ ގްރޫޕްތަކުގެ އިސް ފަރާތްތަކާއި ތާރީހު ދިރާސާ ކުރާ މީހުން ވެސް ހިމެނޭ ގޮތަށް އެކުލަވާލި ޕެނެލަކުން ފިލްމް ބަލައި ރިވިއު ކުރުމަށް ފަހު އެވެ. އަދި ފާސްކޮށް ދޭން ނިންމީ އެ ޕެނެލުން ޝަރުތު ކުރި ކަންކަމަށް ރިއާޔަތްކޮށް، ފިލްމާ ބެހޭ ލިޔެކިޔުންތައް ހުށަހެޅުމުން އެކަން ނިންމައިދޭ ގޮތަށެވެ.
"ޕަދްމާވަތީ" ގެ ނަމުގައި ފިލްމްގެ އިޝްތިހާރުކޮށްފައި ވަނިކޮށް މީގެ ނަން "ޕަދްމާވަތު" އަށް ބަދަލު ކުރަން ޖެހުމަކީ ވަރަށް ބޮޑު ގެއްލުމަކަށް ވާނެ އެވެ.
މި ފިލްމް މިހާރު ރިލީޒް ކުރަން ތާވަލްކޮށްފައި ވަނީ ފެބްރުއަރީ، 9، 2018 ގަ އެވެ.