ހުޅުމީދޫގައި ގާއިމު ކުރަން 2014 ގައި އިއުލާން ކުރި މިފްކޯގެ މަސް ފެކްޓްރީ މި އަހަރު ހުޅުވާނެ ކަމަށް ކުރިން ބުނި ނަމަވެސް އެކަން ވެސް ކުރެވޭ ގޮތް ނުވެ މި އަހަރު ވެސް ނިމުމަކަށް އަތުވެއްޖެ އެވެ.
މި މަޝްރޫއު ރަސްމީކޮށް އިއުލާން ކުރީ ހުޅުމީދޫގައި ޑިސެމްބަރު 28، 2014 ދުވަހުގެ ރޭ ބޭއްވި ބޮޑު ރަސްމިއްޔާތެއްގަ އެވެ. އެ ރަސްމިއްޔާތުގައި ރައީސް އަބްދުﷲ ޔާމީން ވެސް ބައިވެރިވަޑައިގެންނެވި އެވެ.
ނަމަވެސް، މަސް ފެކްޓްރީގެ ބިންގާ އެޅޭ ވަރުވީ ޖެނުއަރީ 9، 2016 ގަ އެވެ. އޭގެ މަޑު ދުވެލީގައި މަސައްކަތް ކުރަމުން ދިޔަ ނަމަވެސް މިފްކޯ އިން ބުނަމުން ދިޔައީ މި އަހަރުގެ ފަހުކޮޅު އެތަން ހުޅުވާނެ ކަމަށެވެ.
މިފްކޯ އިން ބުނީ ހަތް މިލިއަން ޑޮލަރު ހަރަދުކޮށްގެން ގާއިމު ކުރާ އައްޑޫ މަސް ފެކްޓްރީއަކީ 1،500 ޓަނުގެ ކޯލްޑް ސްޓޯރޭޖް ފެސިލިޓިއަކާ އެކު ދުވާލަކު 100 ޓަނުގެ މަސް ގަނޑުކުރެވޭ ގޮތަށް ގާއިމު ކުރާ ތަނެއް ކަމަށެވެ. އަދި އެ ފެކްޓަރީގައި 50 ޓަނުގެ އައިސް ޕްލާންޓަކާއި 200 ޓަނުގެ ތެލާއި 250 ޓަނުގެ ފެން އެއްފަހަރާ ރައްކާ ކުރެވޭނެ އެވެ.
މިފްކޯ އިން މިހާރު ބުނަނީ ފެކްޓްރީގެ މަސައްކަތް ގާތްގަނޑަށް މިހާރު ނިމިފައިވާ ކަމަށާއި އަންނަ އަހަރުގެ ކުރީކޮޅު އެތަން ހުޅުވާނެ ކަމަށެވެ.