ހުޅުމާލޭގައި އިރުގެ ހޫނުން 1.5 މެގަވޮޓްގެ ކަރަންޓު އުފެއްދުމުގެ މަސައްކަތް ހައުސިންގ ޑިވެލޮޕްމެންޓް ކޯޕަރޭޝަނުން ފަށައިފިއެވެ.
އެޗްޑީސީން ބުނެފައިވަނީ ވޯލްޑް ބޭންކާއި އެނާޖީ މިނިސްޓްރީ ގުޅިގެން ފަށާފައިވާ މިމަޝްރޫއުގެ ދަށުން 1،000 ހައުސިން ޔުނިޓުތަކުގެ ތެރެއިން ހޮވާލެވޭ ބައެއް ގެތަކުގައި ސޯލާ ޕެނެލް ހަރުކުރުމަށް ވަނީ ހަމަޖެހިފައި ކަމަށެވެ.
މިކަމުގައި ބޭނުންކުރާނެ ޕެނެލްތައް މިހާރު ރާއްޖެ ގެނެސްފައިވާއިރު މިމަސައްކަތް ކުރާނީ ހުޅުމާލޭ ރިނިއުބަލް އެނާޖީ ކޮމްޕެނީއިންނެވެ. މިއީ ޗައިނާއާއި ސުވިޒަލޭންޑުގެ ކުންފުންޏެއް ގުޅިގެން އުފައްދާފައިވާ ކުންފުންޏެކެވެ.
އެޗްޑީސީން މައުލޫމާތު ދޭ ގޮތުގައި މަސައްކަތް ފަށާތާ ތިން މަސްދުވަހުގެ ތެރޭގައި މަސައްކަތް ނިންމުމަށް ހަވާލުކޮށްފައިވާ ކަމަށެވެ. ނަމަވެސް ސޯލާ ޕެނެލްތަކުން އުފައްދާ ކަރަންޓު ގުޅާނީ ސްޓެލްކޯގެ ގްރިޑުގައިތޯ އަދި ކަށަވަރު ވެފައެއް ނުވެއެވެ.
އައްޑޫ ސިޓީގައި ސޯލާ ޕެނެލް ގެނެސްގެން ހަރުކުރަން ފެށުމުން ފެނަކަ ކޯޕަރޭޝަނުން ވަނީ އެކުންފުނީގެ ގްރިޑާއި ގުޅޭނީ ވަކި ލިމިޓަކަށް ކަމަށާއި ފީއެއް ނެގޭނެ ކަން ފެނަކައިން ވަނީ އަންގާފައެވެ.