ދެހާސް ސަތާރަ ނިމުނު އިރު އައްޑޫގައި ސަރުކާރުން ކުރިއަށް ގެންދަން އިއުލާން ކުރި މަޝްރޫއުތަކުގެ ތެރެއިން އެއް ކަމަކީ ފޭދޫގައި 100 ހައުސިން ޔުނިޓް އެޅުމެވެ.
އެހެންވެ ރައްޔިތުން ތިބީ މަސައްކަތް ފަށާނެ ދުވަހެއްގެ އިންތިޒާރުގަ އެވެ. ސުވާލަކީ މި މަޝްރޫއުގެ މަސައްކަތް ކިހާ ހިސާބަކަށް ގޮސްފިތޯ އެވެ؟
ސަރުކާރުން ބުނެފައިވާ ގޮތުގައި ފޭދޫގައި 100 ހައުސިން ޔުނިޓް އަޅަން، ބަޔަކާ ހަވާލު ކުރުމުގެ ތައްޔާރީތައް ވަނީ ފަށައިފަ އެވެ. އެކަމަކު ބަޔަކާ އެކު އެއްބަސްވުމުގައި ސޮއި ކުރެވޭނެ ތާރީހެއް އަދިއެއް ނޭނގެ އެވެ.
މި ހައުސިން ޔުނިޓްތައް އަޅަން ހަމަޖެހިފައި ވަނީ ފޭދޫގައި މިދިޔަ އަހަރު ހިއްކި ބިމުގަ އެވެ. ހައުސިން ޔުނިޓްތައް އެޅުމުގެ އިތުރަށް ބިމުގައި ތަރައްގީގެ އެހެންވެ މަޝްރޫއުތައް ވެސް ހިންގަން ސަރުކާރުން ވަނީ ނިންމައިފަ އެވެ.
އޭގެ ތެރެއިން އެއް ކަމަކީ ފޭދޫގައި އިމާރާތް ކުރާ އިންޑޯ ސްޕޯޓްސް ކޮމްޕްލެކްސް އެވެ. ޔޫތު މިނިސްޓްރީގެ ދަށުން ކުރިއަށް ގެންދާ މި މަޝްރޫއު މަޑުމަޑުން ކުރިއަށްދާކަން ފާހަގަކޮށްލެވެ އެވެ.
އެކަމަކު މި ކޮމްޕްލެކްސްގެ ބިންގާ މެއި، 4، 2017 ގައި އެޅީ މިދިޔަ އޮކްޓޯބަރު މަހުގެ ތެރޭގައި ނިންމާ ގޮތަށެވެ. ނަމަވެސް ޕްރޮޖެކްޓާ ހަވާލުވި ވިމްލާ ކޮންސްޓްރަކްޝަން މަސައްކަތް ކުރިއަށްދާ ގޮތަށް ބަލާ އިރު، މިއީ އަދި އެހާ އަވަހަށް ނިމޭނެ ޕްރޮޖެކްޓެއް ކަމަކަށް ނުބެލެވެ އެވެ.
އަނެއްކޮޅުން ފާހަގަކޮށްލަން ޖެހޭ އަނެއް ކަމަކީ މި ސަރުކާރުން އައްޑޫގައި މިހާތަނަށް ފެށި އެއްވެސް މަޝްރޫއެއް މިހާތަނަށް ފުރިހަމަވެފައި ނެތް ކަމެވެ.
ފޭދޫގައި ހައުސިން ޔުނިޓްތަކެއް އަޅާ ވާހަކަ މި ސަރުކާރުން ދެއްކި އިރު، ކުރީގެ ރައީސް މުހައްމަދު ނަޝީދުގެ ވެރިކަމުގައި ފޭދޫގައި 25 ޔުނިޓް އަޅައި، އެތަންތަނުގައި މީހުން އަންނަނީ މިހާރު ވެސް ދިރިއުޅެމުންނެވެ.
މި ސަރުކާރުން ހިތަދު އާއި ހުޅުމީދޫގައި އިމާރާތް ކުރި ފްލެޓްތައް ނިމިފައި ހުންނަތާ ދޮޅު އަހަރުވީ ވެސް އެތަންތަން އަދި ހަވާލެއް ނުކުރެ އެވެ.