މިދިޔަ އަހަރު ރިލީޒް ކުރި ފިލްމްތަކުގެ ތެރެއިން އެންމެ ކާމިޔާބު އެއް ފިލްމް ކަމަށްވާ "ބައިވެރިޔާ" އާ އަހަރުގެ ހަދިޔާއެއްގެ ގޮތުގައި ވީޓީވީން މިރޭ ދައްކާ ގޮތަށް ނިންމައިފި އެވެ.
ފިލްމް ދައްކަން ފަށާނީ މިރޭ 10:05 ގަ އެވެ. އެހެންވެ މިއީ "ބައިވެރިޔާ" ބޮޑު ސްކްރީނުން ބަލައިލަން ފުރުސަތު ނުލިބުނު މީހުންގެ އިތުރަށް އަލުން ބަލައިލަން ބޭނުންވާ މީހުންނަށް ވެސް ލިބޭނެ ފުރުސަތަކަށް ވެގެން ދާނެ އެވެ.
"ބައިވެރިޔާ" އަކީ ބަތަލާ ނިއުމާ މުހައްމަދާއި އިސްމާއީލް ޝަފީގް ޕްރޮޑިއުސްކޮށް، ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށްފައިވާ ރޮމޭންޓިކް ކޮމެޑީއެކެވެ.
ބޮޑު ކާސްޓެއް ހިމެނޭ ފިލްމްގެ ތަރިންގެ ތެރޭގައި ޔޫއްޕެ، ޝީލާ ނަޖީބް، މުހައްމަދު ފައިސަލް، މަލީހާ ވަހީދު، އަހުމަދު އަޒްމީލް އަދި އަހުމަދު ސައީދު ފަދަ ތަރިން ހިމެނެ އެވެ.