އައްޑޫ ލިންކް ރޯޑްގައި މިދިޔަ މަހުގެ 26 ވަނަ ދުވަހު ޕިކަޕަކާއި ސައިކަލެއް އެކްސިޑެންޓްވެ، ސައިކަލްގައި އިން ކުއްޖަކު މަރުވި މައްސަލާގައި ފުލުހުން ހައްޔަރު ކުރި އެންވަޔަރަމަންޓް މިނިސްޓްރީގެ ޕިކަޕްގެ ޑްރައިވަރުގެ ބަންދަށް ހަ ދުވަސް ހިތަދޫ މެޖިސްޓްރޭޓް ކޯޓުން ޖަހައި ދީފި އެވެ.
ގދ. ވާދު އަށް ނިސްބަތްވާ އަރްޝަން އިބްރާހީމް، 12، މަރުވި ހާދިސާއާ ގުޅިގެން 33 އަހަރުގެ ޕިކަޕް ޑްރައިވަރު ހައްޔަރު ކުރީ ޑިސެމްބަރު މަހުގެ 31 ވަނަ ދުވަހުގެ ރެ އެވެ.
އޭނާ ހައްޔަރުކޮށް މައްސަލަ ތަހުގީގު ކުރަމުން ދިޔަ ނަމަވެސް، ފުލުހުން މިކަމާ ބެހޭ ގޮތުން އިތުރު އެއްވެސް މައުލޫމާތެއް ނުދެ އެވެ.
އަރްޝަމް މަރުވީ އޭނާގެ ރައްޓެހި އެހެން ކުއްޖަކާ އެކު ދުއްވާފައި ދިޔަ ސައިކަލްގެ ފަހަތުން ބާރު ސްޕީޑްގައި ދުއްވި ޕިކަޕް ސައިކަލްގެ ޖެހި ހިނގި ހާދިސާގައި ލިބުނު އަނިޔާތަކަށް ފަރުވާ ދެމުން ދަނިކޮށެވެ.
މި ހާދިސާ ހިނގި އިރު ސައިކަލް ދުއްވަން އިނީ މަރަދޫ ހިނރުދުގަސްދޮށުގޭ، އަނަސް ހުސެއިން، 21، އެވެ.
އޭނާ އަށް ލިބުނު އަނިޔާތަކަށް މިހާރު ވެސް ފަރުވާ ދެމުން އަންނަ އިރު، އެކްސިޑެންޓްގައި އަނަސްގެ ޅިނދުކަށިގަނޑުގެ ދެ ފަރާތުން ބިނދި، ދެފައި ވެސް ބިނދިފައި ކަމަށް ފަރުވާ ދެމުން އަންނަ އައިޖީއެމް ހޮސްޕިޓަލުން ބުނެފައިވެ އެވެ.