މި އަހަރުގެ ރިޔާސީ އިންތިހާބުގައި އެމްޑީޕީގެ ކެންޑިޑޭޓެއްގެ ގޮތުގައި ކުރީގެ ރައީސް މުހައްމަދު ނަޝީދަށް ވާދަ ކުރެއްވޭނެ އެއްވެސް ހައިސިއްޔަތެއް ނެތް ކަމަށް އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެ އެވެ.
މޫސަ މިހެން ވިދާޅުވީ، ޓީވީއެމްގެ "އުންމީދާއި ކުރިއެރުން" ޕްރޮގްރާމްގައި ވާހަކަ ދައްކަވަމުންނެވެ.
މޫސަ ވިދާޅުވި ގޮތުގައި އެމްޑީޕީ އަށް އޮތް ދަންތުރައަކީ ރައީސް ނަޝީދެވެ. އަދި ނަޝީދަށް ތާއީދެއް ނެތްކަން، ރާއްޖެ ޓީވީން ނެގި ޕޯލުން ވެސް ސާބިތުވެއްޖެ ކަމަށް މޫސަ ވިދާޅުވިއެވެ.
"ސިޔާސީ ދާއިރާގައި ކަންކަން ކުރާ ގޮތަށް ބަލާ އިރު ރައީސް ނަޝީދަކާއި ކުރީގެ ރައީސް މައުމޫން އަބްދުލް ގައްޔޫމާއި އެއްވެސް ތަފާތެއް ނެތް މިހާރަކު. އަދި ރައީސް މައުމޫނަށް ވުރެ ވެސް އިތުރުފުޅު ހެއްދެވުމުގައި ރައީސް ނަޝީދު މި ހުންނަވަނީ ތަންކޮޅެއް ކުރީގައި،" މޫސަ ވިދާޅުވި އެވެ.
މީގެ އިތުރުން ރިޔާސީ އިންތިހާބުގައި ރައީސް އަބްދުﷲ ޔާމީން ބަލި ކުރަން އިދިކޮޅު އިއްތިހާދުން އެއް ކެންޑިޑޭޓަކު ނެރޭނެ ކަމަށް ބުންޏަސް އެއީ އެ މީހުންނަށް ކުރެވޭނެ ކަމެއް ނޫން ކަމަށް ވެސް މޫސަ ވަނީ ވިދާޅުވެފައެވެ. އިދިކޮޅު ކޯލިޝަންގައި މިހާރު ވެސް ކޯޅުންތައް ބޮޑުވެފައިވާ ކަން ފާހަކުރައްވައި މޫސަ ވިދާޅުވީ، "އިއްތިހާދަށް އެއް ކެންޑިޑޭޓަކު ނުނެރޭވެ ކަމުގެ އަލާމާތްތައް މިހާރު ވެސް ފެންނަން ފަށައިފި" ކަމަށެވެ.