މާޗް، 2، 2016 ވަނަ ދުވަހު އަނިޔާވެރި ގޮތަކަށް މަރާލުމަށް ފަހު އޮޅެއްގެ ތެރެއަށް އެއްލާލާފައި ވަނިކޮށް ފެނުނު ހިތަދޫގެ ވިޔަފާރިވެރިޔާ، އަލީ އަބްދުﷲގެ މަރުގެ މައްސަލައިގައި ދެ އަޑުއެހުމެއް މިއަދު ކްރިމިނަލް ކޯޓުގައި ބާއްވާ ގޮތަށް ނިންމައިފި އެވެ.
މިއަދު މެންދުރު ފަހު 1:00 ޖަހާއިރު އޮންނަ ފުރަތަމަ އަޑުއެހުމަކީ، އަލީ އަބްދުﷲ މަރާލި މައްސަލައިގައި އެނގިހުރެ މީހަކު މެރުމުގައި ބައިވެރިވުމުގެ ދައުވާ އުފުލާފައިވާ، ސ.ހިތަދޫ އަތަމާވިލާ، މައޫޒު މުހައްމަދާއި އެ ރަށު އައްޒާ، މުބާރިކު މުހައްމަދުގެ މައްޗަށް ކުރާ ދައުވާގެ އަޑުއެހުމެކެވެ.
އަދި މިއަދު 2:00 ޖަހާއިރު އޮންނާނީ އަލީ މަރާލި މައްސަލައިގައި، ސ.ހިތަދޫ، ހެޕީ ފިއުޗާ، އަހުމަދު އިބްރާހީމްދީދީގެ މައްޗަށް ދައުލަތުން ކުރާ ގަސްދުގައި މީހަކު މަރާލި ކަމުގެ ދައުވާގެ އަޑުއެހުމެކެވެ.
އަލީ އަށް ބޮޑު ބޭބެ ކިޔާ އަހުމަދު އިބްރާހިމްދީދީ، ހައްޔަރު ކުރުމަށް ފަހު އޭނާ ދިރިއުޅޭ ގެ ފުލުހުން ބަލައި ފާސް ފާސް ކުރަނިކޮށް އަލީގެ ފިހާރަ އިން ވަގަށް ނަގާފައިވާ ކަމަށް ބެލެވޭ ގިނަ އަދަދެއްގެ ފައިސާ ފެނިފައިވެ އެވެ.