ސަންޖޭ ދަތުގެ މަންމަ އަދި ކުރީގެ މަޝްހޫރު ބަތަލާ ނަރްގިސްގެ ފިލްމީ ކެރިއަރުގައި ކުޅުނު އެންމެ ފަހު ފިލްމް "ރާތު އޯރް ދިން" ގެ ރިމެކިންއެއް ހަދަން ނިންމާފައިވާ އިރު، އެ ފިލްމުގައި ނަރްގިސްގެ ރޯލް ކުޅެން އައިޝްވާރިޔާ ރާއީ އެއްބަސްވެއްޖެ އެވެ.
މި ފިލްމް ޕްރޮޑިއުސް ކުރާ ކްރިއާޖް އެންޓަޓައިންމަންޓުން ވާހަކަ ދެއްކި ޕްރޮޑިއުސަރު ޕްރޭނާ އަރޯރާ ބުނީ 1969 ގައި ރިލީޒް ކުރި "ރާތު އޯރް ދިން" ގެ ރިމެކިންއަކީ ވަރަށް ހާއްސަ ފިލްމެއް ކަމަށެވެ. އަދި މި ފިލްމް ކުޅެން އައިޝްވާރިޔާ އެއްބަސްވުމުން ވަރަށް އުފާވެފައި ހުރި ކަމަށް ޕްރޭނާ ބުންޏެވެ.
"އެކަމަކު މި ފިލްމާ ބެހޭ އިތުރު ތަފުސީލަކަށް ދާން އަދި މާ އަވަސް،" އޭނާ ބުންޏެވެ.
"ރާތު އޯރް ދިން" ކުޅެގެން ނަރްގިސް ފިލްމީ ކެރިއަރު ނިންމައިލީ އެންމެ މޮޅު ބަތަލާގެ ނެޝަނަލް އެވޯޑާ ވެސް އެކުގަ އެވެ. ވަރަށް ހިތްގައިމު ރީތި ލަވަތަކެއް ހިމެނޭ ފިލްމްގައި ނަރްގިސްއާ އެކު ލީޑް ރޯލް ކުޅުނީ ފީރޯޒް ހާނާއި ޕްރަދީޕް ކުމާރެވެ. މީގައި ނަރްގިސް ކުޅުނީ މަލްޓިޕްލް ޕާސަނަލިޓީ ޑިސްއޯޑާ ހުންނަ އަންބެއްގެ ރޯލެވެ.
ޕްރޭނާ ބުނީ ރިމެކިންގައި އައިޝްވާރިޔާއާ އެކު ބަތަލުންގެ ރޯލް ކުޅޭނެ އެކްޓަރުންތަކެއް ވެސް ހޯދަން މިހާރު މަސައްކަތް ކުރަމުން އަންނަ ކަމަށެވެ. ފިލްމް ޑައިރެކްޓް ކުރަން ހަމަޖެހިފައި ވަނީ ސިދާތު އާނަންދް އެވެ.
އައިޝްވާރިޔާ ދެން އެންމެ އަވަހަށް ފެނިގެން ދާނީ ވެސް ޕްރޭނާ ޕްރޮޑިއުސް ކުރާ ފިލްމަކުންނެވެ. އެއީ އަނިލް ކަޕޫރާއި ރާޖްކުމާރް ރާއޯއާ އެކު ކުޅެފައިވާ "ފޭން ހާން" އެވެ.