އަމިއްލަ ވަޒީފާގައި ތިއްބަވާ މަސައްކަތްތެރިންނަށް ވެސް ޕެންޝަނާއި އެންމެ ދަށުން ދެވޭނެ އުޖޫރަ އާއި އަގުހެޔޮ ޚިދްމަތްތައް ހަމަޖައްސަވާނެ ކަމަށާއި އެމްޑީޕީ ސަރުކާރުގެ ކުރިއަށް އޮތް ދައުރުގައި އެކަންކަން ފުރިހަމަކޮށް ދެއްވާނެ ކަމަށް އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް މުހަންމަދު ނަޝީދު ވިދާޅުވެއްޖެ އެވެ.
އެމްޕީއެލް އާއި ކަސްޓަމްސް ކައިރީގައި ތައްޔާރު ކުރެވުނު އެމްޑީޕީ “ސަރަހައްދު ޖަގަހަ” ރޭ ހުޅުވައި އްވުމަށްފަހު ދެއްކެވި ވާހަކަފުޅުގައި ނަޝީދު ވިދާޅުވީ ކޮންމެ ދިވެހި ރައްޔިތަކަށްމެ ދޮށީ ޢުމުރުގައި ޕެންޝަން ލިބެވޭނެ އިންތިޒާމް ހަމަޖެއްސެވީ އެމްޑީޕީގެ ސަރުކާރުން ކަމަށެވެ.
އަދި ރަސްމީ ވަޒީފާގައި ޚިދްމަތް ކުރައްވާ ފަރާތްތަކަށް ޕެންޝަން ނިޒާމުގެ ތެރެއިން ރަނގަޅު އަދަދެއް ލިބިލައްވާ ކަމަށާއި ހަމަ އެ ފަދައިން އަމިއްލަ ވަޒީފާގައި ތިއްބަވާ މަސައްކަތްތެރިންނަށް ވެސް އެ ނިޒާމުގައި ހިމެނެވޭނެ ގޮތްތައް އެމްޑީޕީ ސަރުކާރުގެ ކުރިއަށް އޮތް ދައުރުގައި ހަމަޖައްސަވައި ދެއްވާނެ ކަމަށެވެ.
މަޖޫރީންނާއި، ލޮރީ ޕިކަޕް އަދި ޓެކްސީ ޑްރައިވަރުންނަކީ އަމިއްލަ ވަޒީފާގައި ތިއްބަވައި، ހީވާގިކަމާ އެކު ކުރައްވާ އަމިއްލަ މަސައްކަތުން އެ ލިބޭ އެއްޗަކުން ފުދުންތެރި ދިރިއުޅުމެއް އާރާސްތުކުރައްވާ މުރާލި ދިވެހިން ކަމަށާއި، އެފަދަ މަސައްކަތްތަކަށް ވެސް ބިދޭސީން ވާދަ ކުރަނީ ވަޒީފާ ދޭ ފަރާތަށް ބިދޭސީން އަގުހެޔޮވީ މަކަމުގައި ރައީސް ނަޝީދު ފާހަގަކުރެއްވި އެވެ.
ދިވެހީންނާއި ބިދޭސީ މަސައްކަތުގެވެސް އަގު އެއްވަރު ވާން ޖެހޭނެ ކަމަށާއި، މަސައްކަތްތެރިއަކަށް މި ރާއްޖޭގައި ދެވޭނެ އެންމެ ދަށް އުޖޫރައަކީ 4،000 ރުފިޔާ ކަމުގައި ހަމަޖައްސަވައި ދެއްވާނެ ކަމަށާއި، އޭރުން ބިދޭސީ މީހާ އަށް ވެސް އެ ވަރު ދޭން ޖެހެން ފެށުމުން، ވަޒީފާގެ ފުރުޞަތުތައް ދިވެހިންނަށް ގިނަވެގެން ދާނެ ކަމަށް ނަޝީދު ވިދާޅުވި އެވެ.
ވަޒީފާ އާއި އާމްދަނީގެ ފުރުޞަތުތައް ހޯދުމަށް މަސައްކަތް ކުރާ ޒުވާނުން ނިސްބަތުން ގިނަ ކަމުގައި ފާހަގަ ކުރައްވަމުން ރައީސް ނަޝީދު ވިދާޅުވީ އެކަންކަން ހައްލު ކުރުމަށް އެމްޑިޕީން ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ.
ހުނަރު ޕްރޮގްރާމާއި ވޮކޭޝަނަލް ޓްރޭނިންގް ގެ ފުރުޞަތުތައް އެމްޑިޕީން ވަނީ މިހާރު ވެސް ފަހިކޮށް ދެއްވާފައި ކަމަށާއި އެފަދަ ޕްރޮގްރާމްތަކަށް މެދުވެރިވެފައިވާ ހުއްޓުންތަކާ ހުރަސްތައް ކަޑައްތުވކުރައްވާނެ ކަމަށް ވެސް ނަޝީދު ވިދާޅުވި އެވެ.
އެމްޑީޕީން ފަށްޓަފައިވާ ގެސްޓް ހައުސް ސިޔާސަތުތައް ރާއްޖޭގެ އެކި ސަރަހައްދުގައި ކުރިއަށް ގެންދެވޭން ފެށުމުން ވަޒީފާގެ ފުރުޞަތުތައް އެއިން ކޮންމެ ރަށެއްގައި އިތުރުވާން ފަށާނެ ކަމަށް ނަޝީދު ފާހަގަ ކުރެއްވި އެވެ.
ކޮންމެ ގެސްޓް ހައުސްއަކުން ނުވަ ވަރަކަށް ވަޒީފާ އުފެދިގެންދާނެ ކަމަށާއި ހަމައެއާ އެކު ދެތިން ގެސްޓްހަ އުސްވުމުން ގުޅިފައިވާ އެކިދާއިރާ އިން (ބޭކަރީ، ލޯންޑްރީ، ޑައިވިންގް، މެކޭނިކުންނާއި ވާރކްޝޮޕާއި އަތްތެރިމަސައްކަތާ ޝަގާފީ އުފެއްދުންތެރިކަން ފަދަކަންކަން) ހުޅުވިގެން ދާނެ ކަމަށް ވެސް ވިދާޅުވި އެވެ.
ރަސްމީ ވަޒީފާގައި ނިސްބަތުން ގިނަ އަދަދެއްގެ ދިވެހިން މަސައްކަތްކުރައްވާއިރު، އަމިއްލަ މަސައްކަތުން، އަމިއްލަ ވަޒީފާގައި މަސައްކަތް ކުރައްވާ ފަރާތްތަކަކީ މި ރާއްޖޭގެ އިގްތިޞާދަށް ވަރަށް އަގުހުރި ހިއްޞާތަކެއް ފައިދާކޮށް ދެއްވާ ފަރާތްތަކެއް ކަމުގައި ވިދާޅުވެ ރައީސް މުހަންމަދު ނަޝީދު ވަނީ ރާއްޖޭގެ މަސައްކަތްތެރިންނަށް ތަޢުރީފު ކުރައްވާފަ އެވެ.
މަސައްކަތްތެރިންގެ ހައްގުތައް ރައްކާތެރިކޮށް ދެއްވުމަކީ ކުރިއަށް އޮތް ދައުރަށް އެމްޑީޕީން ކަނޑައަޅާ ސިޔާސަތުތަކުގެ މުހިންމު ބައެކެވެ.