"ބާހްބަލީީ" ކުޅެގެން ލިބުނު ބޮޑު މަޝްހޫރުކަމާ އެކު، ހިންދީ ފިލްމްތަކުން ވަރަށް ގިނަ އޮފާތަކެއް ލިބެމުން އަންނަ ކަމަށާއި މިހާރު ކުޅެމުން އަންނަ "ސާހޯ" އަށް ފަހު، ދެން ކުޅޭތީ ހިންދީ ފިލްމެއް ކަމަށް އިންޑިއާގެ ސައުތު ފިލްމް އިންޑަސްޓްރީގެ ސްޕަސްޓާ ޕްރަބާސް ބުނެފި އެވެ.
ބޮލީވުޑްގެ ބަތަލާ ޝްރަދާ ކަޕޫރް ބަތަލާގެ ރޯލް ކުޅޭ "ސާހޯ" އަކީ ތެލުގޫ ބަހުގެ އިތުރުން އެހެން ބަސްތަކުން ނެރެން ނިންމާފައިވާ އެކްޝަން ތުރިލާއެކެވެ.
ޕްރަބާސް ބުނީ އެ ފިލްމަށް ފަހު ދެން މަސައްކަތް ފަށާނީ ލޯބީގެ ހިންދީ ފިލްމެއް ކަމަށެވެ.
"އަހަރެން ވަރަށް ގިނައިން ހިންދީ ފިލްމް ބަލަން. ވަރަށް ގިނަ އޮފާތައް ވެސް އާދޭ ބޮލީވުޑުން. އަދި މީގެ ތިން އަހަރެއްހާ ދުވަސް ކުރިން އަހަރެން އޮންނާނެ ހިންދީ ފިލްމަކަށް އެއްބާސް ނިންމާފައި. ސާހޯ އަށް ފަހު އޭގެ މަސައްކަތް ފަށާނީ،" ފިލްމްގެ ތަފުސީލަކަށް ނުގޮސް 38 އަހަރުގެ އެކްޓަރު ބުންޏެވެ.
ހިންދީ ފިލްމްތަކުން އޮފާތައް އޮހެމުން އަންނަ އިރު، ބޮލީވުޑްގެ މަޝްހޫރު ޑައިރެކްޓަރު/ޕްރޮޑިއުސަރު ކަރަން ޖޯހަރްގެ ދަރްމާގެ ފިލްމެއް ޕްރަބާސް ލައްވައި ކުޅުވުން ކަރަން ވެސް ވަނީ މަސައްކަތްތަކެއްކޮށްފަ އެވެ. ކަރަންއަކީ "ބާހްބަލީ" ގެ ހިންދީ ވާޝަން ޕްރެޒެންޓްކޮށް ދިން ޕްރޮޑިއުސަރު ވެސް މެ އެވެ.
ހިންދީ ފިލްމެއްގެ ލީޑް ރޯލް މިހާތަނަށް ކުޅެފައި ނެތަސް އޭނާ ވަނީ 2013 ގައި ރިލީޒް ކުރި ޝާހިދު ކަޕޫރާއި ސޮނާކްޝީ ސިންހާގެ ފިލްމް "އާރް…ރާޖްކުމާރް" ގެ ލަވައެއްގެ ތަންކޮޅެއް ކުޅެފަ އެވެ.