ރައީސް އަބްދުﷲ ޔާމީން ވެރިކަމަށް ވަޑައިގެން އައްޑޫ ރައްޔިތުންނަށްވި ވައުދުތަކުގެ ތެރެއިން އެންމެ މުހިއްމު އެއް ކަމަކީ އައްޑޫ ރައްޔިތުން އެންމެ ބޮޑަަށް އުފުލަން ޖެހިފައިވާ ކަރަންޓް ކެނޑޭ މައްސަލައެއް ހައްލެއް ހޯއްދަވައި ދެއްވުމެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި އައްޑޫގެ ކަރަންޓް ހާލަތާ މެދު އޭރު ފާޑު ކިޔައި، މުޒާހަރާ ވެސް ކުރި އެވެ. އަދި މި ސަރުކާރުގައި ކަރަންޓްގެ މައްސަލަ އަށް ދާއިމީ ހައްލެއް ހޯދައި ދޭނެ ކަމަށް ބުންޏެވެ.
އެކަމަކު ދައުރު މިއޮތް ނިމެނީ އެވެ. ކަރަންޓްގެ މި އަސާސީ ހިދުމަތުގެ ތެރެއިން އައްޑު ރައްޔިތުން އުފުލަން ޖެހިފައިވާ ބުރައަކަށް ނިމުމެއް ގެނެވޭ ގޮތެއް ނުވި އެވެ. ހަގީގަތަކީ ކުރީގެ ސަރުކާރުތަކުގައި އައްޑޫގެ ކަރަންޓްގެ ހާލަތަށް އޮތް ވަރަށް ވުރެ މިހާރު، ހާލަތު ދަށްކަމެވެ.
ހާއްސަކޮށް އައްޑޫގެ ގުޅިފައިވާ އަވަށްތަކުގެ މީހުންނަށް އުޅެން ޖެހިފައި ވަނީ ތަކުލީފު ބޮޑު، ބުރަ ދިރިއުޅުމެކެވެ. ކަރަންޓާ ނުލައި މި ޒަމާނުގައި އުޅެވެން ނެތް އިރު، ހަގީގަތަކީ މި ސަރުކާރަށް އައްޑޫގެ ކަރަންޓް ޔަގީންކޮށް ނުދެވުނު ކަމެވެ. މައްސަލައަކީ އިހުލާސްތެރި ނިޔަތެއްގައި ހިދުމަތެއް ދިނުމުގެ ވިސްނުމެއް ނެތުމެވެ.
އެހެން ނޫން ނަމަ އައްޑޫގެ ކަރަންޓް ހާލަތު ރަނގަޅު ކުރަން 2015 ވަނަ އަހަރު ގެނައި ޖެނެރޭޓަރުތައް، އިންސްޓޯލް ކުރަން ތައްޔާރީތައް ވަމުން ދަނިކޮށް މާލޭގައި މިނިވަން 50 ފާހަގަ ކުރާކަށް އެ ޖަނަރޭޓަރުތައް ނުގެންދިޔައީހެވެ. ބޮޑު އާބާދީއެއް އޮތް ތަނެއްގައި ކަރަންޓްގެ މައްސަލަ ހައްލުކޮށް ދޭން އެދި ރައްޔިތުން ގޮވަގޮވައި އެކަމުގެ އިންތިޒާރުގައި ތިއްބައި، ގެނައި ޖަނަރޭޓަރުތައް ކުލަބޮކިން މާލެ ދިއްލާކަށް ގެންދާކަށް ނުޖެހުނީހެނެވެ.
އަނެއްކޮޅުން އެ ޖަަނަރޭޓަރުތަކުގައި ބަދަލުގައި އާ ޖަނަރެނޭޓަރުތަކެއް އައްޑު އަށް ގެންނަން ވެސް އެތައް ދުވަހެއް ނެގި އެވެ. އެތައް ކޯޅުމެއް ކޯޅެން ޖެހުނެވެ. ރައްޔިތުންގެ މަޖިލީހުގެ ތެރޭގައި ވެސް އިދިކޮޅު މެމްބަރުން މިކަމާ ވަރަށް ކަންބޮޑުވުން ފާޅު ކުރައްވައި ހެއްދެވި އެވެ.
ކަރަންޓް ކެނޑޭ މައްސަލަ އަށް ދާއިމީ ހައްލެއް ގެންނަން ކަމަށް ބުނި ޖަނަރޭޓަރުތައް މިދިޔަ ނޮވެމްބަރު މަހު އިންސްޓޯލްކޮށްފި ޔޯލަ އެވެ. އަދި ޑިސެމްބަރު މަހުން ފެށިގެން މައްސަލަ ހައްލުވާނެ ކަމަށް ބުނެފައިވެ އެވެ.
އެކަމަކު ޑިސެމްބަރު މަހުގެ މެދުތެރެ އަށް ދިޔަ އިރު، ފެނަކައިން ދިނީ އިންޒާރެކެވެ. އަލުން ކަރަންޓް ކަނޑަން ފަށާނެ ވާހަކަ އެވެ. އެގޮތުން މިހާރު ކޮންމެ ދުވަހަކު އަވަށްތަކުން އެކި ގަޑިތަކުގައި އެއް ގަޑި އިރަށް ދަނީ ކަރަންޓް ކަނޑަމުންނެވެ. މިކަމުން އާންމު ރައްޔިތުންނަށްވާ އުނދަގޫތަކާ ދޭތެރޭ ސަރުކާރުން ހެޔޮހިތަކުން ވިސްނާފައެއް ނެތެވެ.
އެ ބުނާ އާ އިންޖީނުތަކުން ލިބޭނެ ހިދުމަތަކާ ދޭތެރޭ ރައްޔިތުން ކުރާނެ މާ ބޮޑު އުންމީދެއް މިހާރަކު ނެތެވެ. މި ސަރުކާރުން މިހާތަނަށް ދެއްކީ ހުސް ވާހަކަ އެވެ.
ރައްޔިތުންގެ އަގު ބޮޑު ކިތައް އިކެލްޓްރޯނިކް ސާމާނު މި މީހުން މިދޭ ހިދުމަތުގެ ސަބަބުން ހަލާކުވެއްޖެ ހެއްޔެވެ؟ އެ ތަކެއްޗަށް ލިބޭ ގެއްލުމުގެ ޒިންމާ ނަގާނެ ބަޔަކު ވެސް ނެތެވެ.
ދެހާސް ތޭރަ އިން ފެށިގެން އައްޑޫގެ ކަރަންޓް ހާލަތު ރަނގަޅުކޮށް ދޭނެ ކަމަށް ސަރުކާރުން ބުނި ނަމަވެސް 2018 އާ އެެކު ރިޔާސީ ދައުރު ނިމޭ އިރު ވެސް، އެ ވައުދެއް ފުއްދައެއް ނުދެވުނެވެ.
ކުރިއަށް އޮތީ ރިޔާސީ އިންތިހާބެވެ. އެހެންވެ ވޯޓް ފޮށްޓާ ހަމައަށްދާ އިރު، ރައްޔިތުން މިކަމާ ދޭތެރޭ ވަރަށް ސީރިއަސްކޮށް ވިސްނާނެ އެވެ.
ކުޅެދޭ މީހުން ނުކުޅެދޭ މީހުންނަށް ހަދާފައި ވެސް ވޯޓް ހޯދި ދާނެ ކަމަށް ސަރުކާރަށް ގަބޫލު ކުރެވުނަސް، އައްޑޫ ރައްޔިތުން މި ސަރުކާރަށް ދެވަނަ ފުރުސަތެއް ދިނުމާ ދޭތެރޭ ހަމަ ޔަގީނުން ވެސް ފުންކޮށް ވިސްނާނެ އެވެ.
ކިތަންމެ ވަރަކަށް ކަރަންޓް ކަނޑާއި އަހުވަ ދެއްކިޔަސް، އައްޑޫ ރައްޔިތުން ތިބީ ކުޅެދޭ ހާލަތުގަ އެވެ. އެކަން ހަނދާނުގައި ބަހައްޓަން ވާނެ އެވެ.