އައްޑޫގެ ގުޅިފައިވާ އަވަށްތަކުން ދޭތެރެއަކުން ކަރަންޓު ކެނޑޭ މައްސަލަ ހައްލު ކުރެވޭނެ ކަމަށް ފެނަކަ ކޯޕަރޭޝަނުން ބުނަމުން އައި މުއްދަތު ފަހަނަޅައި ދިޔައިރު ވެސް މައްސަލަ ހައްލެއް ނުވެއެވެ.
ކަރަންޓުގެ މައްސަލަ ހައްލުކުރުމަށް 2016 ވަނަ އަހަރުގެ ތެރޭގައި އައްޑޫއަށް ގެނައި 2 މެގަވޯޓުގެ 2 ޖަނެރޭޓަރު އިންސްޓޯލްކޮށް ނިމުނު ނަމަވެސް އެ ޖަނެރޭޓަރުތަކުން ކަރަންޓު ދޫކުރާކަށް ނުފަށައެވެ. ފެނަކައިން ބުނާގޮތުގައި އެ 2 ޖަނެރޭޓަރުން ކަރަންޓު ދޭން ނުފެށެނީ، ބައެއް ކަންތައް ފުރިހަމަ ނުވާތީއެވެ.
ފެނަކައިން ބުނާ "ބައެއް ކަންތައް ފުރިހަމަ ނުވެ" 2018 ވަނަ އަހަރު ފެށުމުން އައްޑޫ ރައްޔިތުން އުއްމީދުކޮށްގެން ތިބީ މާގިނަ ދުވަސްތަކެއް ނުވެ ކަރަންޓުގެ މައްސަލަ ހައްލުވާނެ ކަމަށެވެ.
އެހެން ނަމަވެސް ކަންތައް ވަމުންދާ ގޮތަށް ބަލާއިރު، ކަރަންޓުގެ މައްސަލައަށް ދާއިމީ ހައްލެއް ލިބުން އޮތީ މާ ދުރުގައި ކަމަށް އައްޑޫގެ ގިނަ ރައްޔިތުން ގަބޫލުކުރެއެވެ.
އޭގެ ހެއްކެއް ގޮތުގައި ސޯޝަލް މީޑިޔާގައި ބައެއް ފަރާތްތަކުން ފާހަގަކުރަނީ، 2018 ވަނަ އަހަރު ފެށުނު ފަހުން މިވީ 6 ދުވަހުގެ ތެރޭގައި އައްޑޫގެ އެކި ހިސާބުތަކުން 18 ފަހަރަށް ވުރެ ގިނައިން ކަރަންޓުގެ ޚިދުމަތް ވަނީ މެދުކެނޑުމެވެ.
އާއްމު ރައްޔިތުން ބުނާ 18 ފަހަރަށް ވުރެ ގިނައިން ފާއިތުވި 6 ދުވަހު އައްޑޫގެ ގުޅިފައިވާ އަވަށްތަކުގެ އެކި ހިސާބުތަކުން ކަރަންޓު ކެނޑިފައިވާނެ ކަމަށް ބެލެވެއެވެ.
ފާއިތުވި 6 ދުވަހަށް އެކަނި ބެލިޔަސް، ކޮންމެ ރެއަކުނ ހެން ހިތަދޫގެ 3 ސަރަހައްދަކުން 1 ގަޑިއިރަށް ކަރަންޓު ކަނޑާއިރު، ފޭދޫ އާއި މަރަދޫ އަދި މަރަދޫފޭދޫން ވެސް ކަރަންޓު ކަނޑައެވެ.އެހެންވެ ކަރަންޓު ކެނޑުނު ފަހަރުތަކުގެ އަދަދު 18 އަށް ވުރެ އިތުރުވުމަކީ އެކަށީގެންވާ ކަމެކެވެ.