ފިލްމް ކުޅެނީ އެއްވެސް ހާލެއްގައި ކޮންމެހެން އެވޯޑްތަކެއް ހޯދުމުގެ ބޭނުމުގައި ނޫން ކަމަށާއި ބޭނުން ވަނީ ރަނގަޅު މަސައްކަތްތަކެއް ކުރަން ކަމަށް ބަތަލާ ސޯނަމް ކަޕޫރު ބުނެފި އެވެ.
ސަންޖޭ ލީލާ ބަންސާލީގެ "ސާވަރިޔަ" އިން 2007 ގައި ބޮލީވުޑަށް ނުކުތުމަ ފަހު "ރާންޖަނާ" އާއި "ނީރްޖާ" ގަދަ ފިލްމްތައް ކުޅެފައިވާ ބަތަލާ ބުނީ އެންމެ ބޮޑު ބޭނުމަކީ ބެލުންތެރިން ބަލައި ގަންނަ ކަހަލަ ފިލްމްތަކެއްގައި މަސައްކަތް ކުރުން ކަމަށެވެ.
ސޯނަމް ބުނީ އޭނާއަކީ އެއް އިރެއްގައި އެއްވެސް ބަތަލާއަކާ ވާދަވެރި ކަމެއް އޮވެގެން ވެސް މަސަައްކަތް ކުރާ މީހެއް ނޫން ކަމަށެވެ.
ނަމަވެސް މި މަހުގެ 25 ގައި ސޯނަމްގެ "ޕެޑްމޭން" އާއި ދީޕިކާ ޕަދްކޯންގެ "ޕަދްމާވަތު" ރިލީޒް ކުރާތީ، މިއީ ދެ ތަރިންގެ ކުރިމަތިލުމެއް ކަމަށް ގިނަ ބަޔަކު ސިފަކޮށްފައިވެ އެވެ.
ދީޕިކާގެ ފުރަތަމަ ފިލްމް "އޯމް ޝާންތީ އޯމް" އަކީ "ސާވަރިޔާ" އާ އެއް ދުވަހެއްގައި ރިލީޒްކޮށްގެން، ސޯނަމް ބަލިކޮށްލި ފިލްމެކެވެ. އެހެންވެ މި ފަހަރު އަނެއްކާ ވެސް ތާރީހު އިޔާދަ ވާނެ ކަމަށް ބައެއް މީހުން ބުނެ އެވެ.
"ނީރްޖާ" އިން ނެޝަނަލް އެވޯޑް ވެސް ހޯދާފައިވާ ސޯނަމް، 32، ގެ ކުރިއަށް ހުރި ފިލްމްތަކުގެ ތެރޭގައި "ވީރޭ ދީ ވެޑިން" އާއި ބައްޕަ އަނިލް ކަޕޫރާ އެކު ކުޅޭ "އޭކް ލަޅްކީ ކޯ ދޭކާތޯ އޭސާ ލަގާ" އާއި އާއިލީ ފިލްމް ކުންފުނިން އުފައްދާ "ޒޯޔާ ފެކްޓާ" ހިމެނެ އެވެ.