ދާދި ފަހުން ކައިވެނި ކުރި ބޮލީވުޑްގެ މަޝްހޫރު ބަތަލާ އަނުޝްކާ ޝަރްމާ ޕްރޮޑިއުސްކޮށް، ބަތަލާގެ ރޯލް ކުޅެފައިވާ ތިން ވަނަ ފިލްމް "ޕަރީ" ގެ މޯޝަން ޕޯސްޓަރު ދައްކާލައި، ފިލްމް ރިލީޒް ކުރާ ތާރީހު ވެސް އިއުލާންކޮށްފި އެވެ.
މި ފިލްމް ކުރިން ރިލީޒް ކުރާ ގޮތަށް އަންނަ މަހުގެ 9 ގަ އެވެ. ނަމަވެސް މިހާރު ސިނަމާތަކަށް ގެންނަން ތާވަލްކޮށްފައި ވަނީ މާޗް މަހުގެ 2 ގަ އެވެ.
"ޕަރީ" އަކީ އަނުޝްކާ މީގެ ކުރިން ކުޅެފައިވާ ފިލްމްތަކާ މުޅިން ތަފާތު ފިލްމަކަށް ވާނެ ކަމަށް ބެލެވެ އެވެ.
ފިލްމްގެ މޯޝަން ޕޯސްޓަރުން ވެސް ފެންނަ ގޮތުގައި ފިލްމްވެގެން ދާނީ ބިރުވެރި ފާޑުގެ ފިލްމަކަށެވެ. ފިލްމްގެ ޓެގްލައިނަކީ "ނޮޓް އަ ފެއަރީޓޭލް" އެވެ.
މި ފިލްމް ޑައިރެކްޓްކޮށްފައި ވަނީ އަލަށް ޑައިރެކްޝަނަށް ނުކުތް ޕްރޮސިތު ރޯއި އެވެ. "ޕަރީ" ގެ ކާސްޓުންގެ ތެރޭގައި ޕަރަމްބްރަޓާ ޗެޓަޖީ، ރަޖަތު ކަޕޫރް އަދި ރިއާ ޗަކްރަބަތީ ހިމެނެ އެވެ.
މި ފިލްމަކީ އަނުޝްކާގެ ކްލީން ސްލޭޓް ފިލްމްސް އާއި ކްރިއާޖް އެންޓަޓައިންމަންޓް ގުޅިގެން ގެނެސްދޭ ފިލްމެކެވެ.
އަނުޝްކާ އެންމެ ފަހުން ޕްރޮޑިއުސްކޮށް ގެނެސް ދިން ފިލްމަކީ މިދިޔަ އަހަރު ރިލީޒް ކުރި "ފިލޯރީ" އެވެ.
"ޕަރީ" ގެ އިތުރުން އަނުޝްކާ މި އަހަރު ފެންނާނެ ފިލްމްތަކުގެ ތެރޭގައި ޖޫން 29 ގައު ރިލީޒް ކުރާ ސަންޖޭ ދަތުގެ ބައޮޕިކް، ސެޕްޓެމްބަރު 28 ގައި ރިލީޒް ކުރާ "ސުއީ ދާގާ: މޭޑް އިން އިންޑިއާ" އަދި ޑިސެމްބަރު 21 ގައި ރިލީޒް ކުރާ "ޒީރޯ" ހިމެނެ އެވެ.