އައްޑޫ ސިޓީ ހިތަދޫ އަށް ނިސްބަތްވާ ޒުވާނަކު ގެއްލިގެން ހޯދަން ފަށައިފިއެވެ.
ވީނުވީއެއް ނޭނގި ގެއްލިގެން ހޯދަމުން ދަނީ ސ. ހިތަދޫ، ފެލީނާ، އުމުރުން 25 އަހަރުގެ އަލީ ތޮއްޔިބެވެ.
ތޮއްޔިބުގެ އާއިލާގެ މެމްބަރަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި މީގެ 4 ދުވަސް ކުރިން އޭނާ ބެންކަށް ދިއުމަށް މާލެ ދާ ވާހަކަ ބުނި ކަމަށެވެ. އަދި އޭގެ ފަހުން އޭނާގެ ޚަބަރެއް ނުވާ ކަމަށެވެ.
އަދި ތޮއްޔިބު ގެއްލުނުކަން އެނގުނީ އޭނާ މަސައްކަތްކުރާ، ކްލަބް މެޑް ކަނި ރިސޯޓުން ގުޅާފައި ބުނުމުން ކަމަށެވެ.
ކްލަބް މެޑް ކަނި ރިސޯޓުން އާއިލާއަށް މައުލޫމާތު ދިނީ ތޮއްޔިބު މީގެ ތިން ދުވަސްކުރިން އެ ރިސޯޓުގެ ފެރީން މާލެ ގޮސްފައިވާ ކަމަށެވެ. ނަމަވެސް މާލެ ދިޔުމަށްފަހު ތޮއްޔިބު ދަނީ އޭނާގެ ދައްތަމެންގެ ގެއަށް ކަމަށާއި އެހެން ނަމަވެސް މިފަހަރު މާލެ ގޮސް އެގެއަށް ގޮސްފައި ނުވާކަމަށް ވެއެވެ.
ފުލުހުންގެ މީޑިއާ އޮފިޝަލް ވެސް ވަނީ ހިތަޑޫ ޒުވާނެއްގެ ޚަބަރެއް ނުވެގެން މިއަދު ފުލުހުންނަށް ރިޕޯޓް ކޮށްފައިވާ ކަން ކަށަވަރުކޮށްދީފައެވެ.