އައްޑޫގެ ގުޅިފައިވާ އަވަށްތަކަށް ކަރަންޓުގެ ޚިދުމަތް ފޯރުކޮށްދޭ މަރުކަޒީ އިންޖީނުގޭގެ ހާލަތު ރަނގަޅު ކުރުމަށް ގެނެސްފައިވާ 2.2 މެގަވޯޓުގެ 2 ޖަނެރޭޓަރު ޓެސްޓްކޮށް ނިމިފައިވާ ކަމަށާއި އެ ޖަނެރޭޓަރުތަކުގައި އެއްވެސް މައްސަލަ އެއް ނެތް ކަމަށް ފެނަކަ އިން ބުނެފިއެވެ.
ފެނަކަ އައްޑޫ އޮފީހުން މައުލޫމާތު ދޭ ގޮތުގައި އާ ޖަނެރޭޓަރުތައް ޓެސްޓް ކުރުމުގެ ގޮތުން 48 ގަޑިއިރު ވަންދެން ހިންގާފައިވާ ކަމަށާއި ޖަނެރޭޓަރުތަކުގައި އެއްވެސް މައްސަލައެއް ނެތް ކަމަށެވެ.
އާ ޖަނެރޭޓަރުތައް އިންސްޓޯލް ކުރުމުގެ މަސައްކަތްތަކަށް އެ ޖަނެރޭޓަރުތައް އުފެއްދި ކުންފުނީގެ އިންޖިނިއަރުން ވެސް ދަނީ އިންޖީނުގޭގައި ހަރަކާތްތެރިވަމުންނެވެ.
ފެނަކަ އައްޑޫ އޮފީހުގެ އޮފިޝަލަކު ވިދާޅުވި ގޮތުގައި ކުރިއަށް އޮތް ހަފްތާއެއްގެ ތެރޭގައި 2.2 މެގަވޯޓުގެ 2 ޖަނެރޭޓަރުން ކަރަންޓު ދޫކުރަން ފަށާނެ އެވެ. އަދި ދޭތެރެއަކުން ކަރަންޓު ކެނޑޭ މައްސަލަ އެއްކޮށް ހައްލުވެގެން ދާނެ ކަމަށް އޭނާ ވިދާޅުވިއެވެ.