ރާއްޖޭގައި ޑެންގީ ހުން ފެތުރެމުންދާތީ އެކަމަށް ސަމާލުވެ، ރައްކާތެރިވެ ތިބުމަށް ހެލްތް ޕްރޮޓެކްޝަން އެޖެންސީ(އެޗްޕީއޭ) އިން ރައްޔިތުންނަށް އިލްތިމާސް ކޮށްފިއެވެ.
އެޗްޕީއޭއިން މިއަދު ނެރުނު ނޫސް ބަޔާނެއްގައި ބުނެފައިވަނީ ކޮންމެ އަހަރެއްގައިވެސް މިދުވަސްވަރަކީ ޑެންގީ ހުން ފެތުރުމުގެ ފުރުސަތު ބޮޑު ދުވަސްވަރެއް ކަމަށެވެ. އެހެންކަމުން ހުމުން ސަލާމަތްވެ، ރައްކާތެރިވުމަށް އެއިދާރާއިން ޚާއްސަ ފިޔަވަޅުތައް އަޅަމުންދާއިރު، އާންމު ރައްޔިތުންވެސް ފަރުދީ ފެންވަރުގައި ހުމުން ސަލާމަތްވުމަށް މަސައްކަތް ކުރުމަށް އޭޖެންސީން ގޮވާލާފައިވެއެވެ.
އެގޮތުން ދިރިއުޅޭ ގެދޮރުގައި މަދިރި އުފެދޭ ގޮތަށް ފެން ހަރުލާ ގޮތަށް ތަންތަން ނުބެހެއްޓުމާއި، ސާފުތާހިރު ކަމަށް އިސްކަން ދިނުމާއި ހެދުން އަޅާއިރު މަދިރި ނަހަފާނެ ގޮތަށް ރައްކާތެރިކޮށް ހެދުން އެޅުމުގެ އިތުރުން މަދިރި ލޯޝަން ބޭނުން ކުރުމަށް ހެލްތް ޕްރޮޓެކްޝަން އޭޖެންސީން ވަނީ އިލްތިމާސްކޮށްފައެވެ.
ޑެންގީ ހުމަކީ މަދިރީގެ ބާވަތެއް ކަމަށްވާ އީޑީޒް މަދިރީގެ ޒަރިއްޔާއިން ފެތުރޭ ހުމެކެވެ. މީގެ އަލާމާތްތަކުގެ ތެރޭގައި ގަދަޔަށް ހުން އައުމާއި ބޮލާއި ލޮލުގައި ރިއްސުމާއި ހަމުގައި ކުރި، ރަތް ބިހިތަކެއް ނެގުން ހިމެނެއެވެ. މިފަދަ އަލާމާތްތައް ފެންނަ ކަމަށްވާނަމަ ލަސްނުކޮށް ޑޮކްޓަރަށް ދެއްކުމަށް ސިއްހީ މާހިރުން އިލްތިމާސް ކުރެއެވެ.